Jadon le Anias cu an chuah kaa in an lu aa seeng chih. Bronx, Montifiore Medical Center i Children Hospital ah suimilam 27 chung operation an tuah hnuah an lu aa seeng chihmi cu hlawhtling taktak in an thenpiak khawh hna.
An lu an thenpiak khawh hna in puan nem tein an tuampiak hna i, zarh li hnuah an nu le an pa nih an hmuh hna ahcun minung tling pahnih an si cang. An nu Nicole McDonald cu Jadon ihkhun kam te ah a dir in khuaruahhar in a zoh hna.
'A zumh hmanh ka zum kho lo. Khuaruahhar a si ko. A sam tete hna khi zoh hmanh u. A thang manh ngai' tiah an nu nih cun lunglawmhnak in a chim. An pa Christian McDonald zong vam aa hngoh i , 'hey man, na dawh tuk. Zoh tuah. Pa hngakchia tling khitkhat bantuk na lo ko cang' tiah lunglawmhnak in a chim ve.
Upa deuh a simi Jadon nih cun a vun zoh hna i, a kut te a hlerpiak hna. A nau deuh Anias cu khatlei khaan dang tein a rak i hngilh lio a si. Anias cu a lu an tuammi aa phoih dih rih lo. 'Nan tuar a har tuk hringhran. Asinain nan tha cang lai' tiah a pa nih cun nem tein a chimh.
Thla 14 an si cang hnuahh an lu aa senghmi cu an thenpiak hna. An thenpiak hna hnuah thla ruk hrawng sizung ah an um. Faphir aa sengmi an thenpiak hna ah hin thla khat hrawng hi a rau lengmang. Asinaian Jadon le Anias cu an dam a rang i, an tluang ngai.
Dr. James Goodrich hi faphir aa sengmi operation tuah ah an thiam i a minthang taktakmi a si. A voi sarihnak a tuah a si cang. Tutan ka tuahmi hi a har bik a si zeicatiah an thluak tiang in aa tlai dih a ti. Ka tonmi vialte lakah a dam a rang bikmi an si tiah a chim chih.
An nu nih Dr. Goodrich a timi cu 'operation tuah naa harh bikmi an si kho men, asinain a dam a rang bik an si' a ti i, Dr. Goodrich nih 'a si ko' tiah a lu a sukpiak. Ref: CNN.