Kawlram cozah thar nih an hrial i, Budhist hawi hmanh nih an hrialmi phungki ram tanh kal sual timi pa Ashin Wirathu nih nilini ah President thim Donald Trump he kan i lo tiah a chim.
Islam biaknak ka hmuh ning le Donald Trump nih Islam a hmuh ning hi aa khatmi a si. Trump nih a ramchung ah Muslim luhter a duh hna lo bantukin kanmah zong nih ramchung ah Muslim umter hi kan duh ve lo a ti.
A chim thanmi cu 'vawlei nih a kan mawhchiat, asinain kan ram le kan mipi kan dawt hna ruang le kan runven hna ruangah a si. Vawlei nih a ruahnak bimi ah a kan ruah, asinain Donald Trump he kan hmuh ning aa khat ko a ti.
America zong ah Islamic zumhnak aa tlaihmi a rem lomi an um. Islamic zumhnak cu a tihnungmi a si caah American mip cheukhat zong an i ralring. Kanmah zong cu bantuk cu kan si ve a ti. Islam a dohtu Bu nih ruahnak a kan hal ahcun kan bawmh ko hna lai; kanmah nih cun ka va hal hna lai lo tiah a chim chih.
Ashin Wirathu hi huatnak le buainak chuah pitu a si tiah mawhchiat ngaimi a si. 2012 ah Budhist minung hruainak in Rakhine State ah Muslim Rohingya community ah buainak a chuahter i minung 200 leng an rak thi.
Ashin Wirathu le a party hi Ma Ba Tha ti zong in theih an si i, Committee Protect Race and Religion ti zong in theihmi an si. Tu kum July ah khan Senior NLD nih Ba Ma Tha hi kan herh ti hna lo a rak ti. Budhist chung in upa deuh timi zong nih an dirpi ti hna lo.
NLD cozah nih an kan rem lo ti an theih i, a chimmi cu NLD cozah nih kan bu hrawh an timhmi hi an caah a fawi lai lo. Ba Ma Tha nih upadi kan buarmi zeihmanh a um lo tiah Ashin Wirathu nih a chim. Ref: Foxnews.