Biakam Hlun Le Biakam Thar Karlak Chan

Mirang in cun Intertestamental Period an ti i, Biakam Hlun le Biakam Thar karlak chan a si. 

Kum 400 nih a dan hna. Malachi in Biakam Hlun a dong i, Mathai in Biakam Thar aa thok. Kum 400 chungah hin Pathian biaphuan a um lo. Cucaah 'the four hundrend silent years' tiah an auh. Asinain hi chungah Daniel nih hmailei ah a cang te ding a rak phuan cang bantukin tling tein an phan dih (Dan. 2:24, 45; 7: 1-27; 11: 1-35). Hi kum 400 chungah Pathian biaphuan a um lo nain tuanbia tiluan zoh tikah Pathian nih a tinhmi program ning tein tuanbia tiluan a mongh ko timi hmuh khawh a si. 

Jewish Tuanbia

Daniel nih a rak phuan cang bantukin Israel ram cu Medo-Persia uknak in Greece uknak tangah a phan; cun Rome uknak tangah a phan than (Dan. 2: 39, 40; 7: 5- 7). Kum 200 chung hrawng hi Persian nih Jew miphun cu an uk hna (539 - 332 B.C.) An uk chung hna ah Jew miphun cu an khua le an ram ah kir i, sersiam than ding le Jerusalem ah an Pathian biak than ding in zalonnak nawl an pek hna (2 Chanrelnak 36: 22, 23; Ezra 1: 1-4). Biakam Hlun chan a dongh hnuah tiangah kum 100 hrawng hi Persia ram Syria uknak tangah Israel an um rih. Cozah leiin hnahnawhnak um loin zalong tein an biaknak phung le lam zulhnak nawl zong an pek hna. 

334 B.C le 331 B.C karlak ah Alexander the Great nih Persian siangpahrang Darius III cu raltuknak lian voithum dohnak ah a tei i, Persia pennak pi cu Greece uknak tangah a phan. 332 B.C ah Israel zong Greece uknak tangah a phan (Dan. 8: 5-7, 20, 21;  11: 3). Jew miphun hna cu Alexander nih biaknak zalonnak a pek hna; ngunkhuai kholh loin a luatter hna. Asinain 'Hellenism' timi Greek nunphung (culture) luh pi a timh. Greek holh le ruahnak in vawlei pi hi fonh ding in timhnak a ngei. Alexander the Great ruahnak cu a tha ngai nain a hnuzultu hna ruahnak cu Baal biaknak phung a tihnun bantukin an tihnung ve. An nunphung le an ruahnak hi minung leiin ruah ahcun duh an nung ngai nain Pathian thei lo nunphung lawng an si. 

323 B.C ah Alexander a thi i, a ralkap upa hna karlak ah uknak cuhnak a chuak colh. A pennak ram vialte zong an cheuhmel dih (Dan. 8: 22; 11: 4). An karlak ah hnatlaknak an tuah ning ah cun Syria Seleucus I Nicator sinah Israel hi pek a si nain Egypt in Ptolemy I Sater nih Israel cu a lak diam. Mah ruangah hin an pahnih (Seleucid le Ptolemaic dynasties) karlak ah dong loin dohnak a chuak (Dan. 11:5). Cuticun Ptolemy nih Israel cu 301 B.C in 198 B.C tiang a uk (Dan. 11: 6-12). Ptolemy chan ah hin Jew miphun nih biaknak zalonnak cu an ngei pah nain sipuaizi leiah namnehnak an tong ngai. 

198 B.C ah Antiochus III the Great nih Ptolemy V Epiphanes cu a rak tei i, Palestine cu a uknak tangah a rak chiah than (Dan. 11: 13-16). Jew miphun cu Seleucid uknak tangah 143 B.C tiang an rak um (Dan. 11: 17-35). Antiochus IV Epiphanes (175-164 B.C) chan ah cun Jew miphun biaknak phung a cohlang ti hna lo. Amah hlan minung nih an biaknak kongah hnahnawhnak an pe tuk hna lo, asinain Antiochus nih cun Jew miphun biakinn a thurhhnomh pinah an biakinn suingun chawva vialte an hramh dih cang. 167 B.C ah Antiochus nih Palestine ramchung vialte ah Greek phung (hellenization) nan zulh cang lai tiah Jews miphun cu an biaknak phung vialte a kham dih hna. Cu hna cu hngakchia cuarpartannak, an pumhnak, an raithawinak le an puai vialte an si. 

Torah (Biakam Hlun Bible) hrawh hram a thok, siasal biaknak a dirhpiak hna, an thiang lomi raithawinak a tuahter hna i, voksa a eiter hna. Antiochus hi Jew miphun a hrem hmasami a si (Dan. 8: 9-14, 23 - 25; 11: 21 - 35). An biaknak hrimhrim kha hloh dih le phawi dih a timh hna tikah Jew miphun cu biaknak thisa he aa tlaimi an si tikah an tuar hringhran hna. Caan a vun kal deuh tikah an tlangbawi tarpa Mattathias le a fale panga hruainak in Antiochus le Seleucid pennak cu an doh. A hnuah cun 'Maccabean Revolt' tiah an auh, zeicatiah Judas Maccabeus (Soibul) timi hi an unau lakah hruaitu hmasa a si. Kum 24 chung (166 - 142 B.C) raltuknak nih Independence a hmuhter hna; khatlei in a rak thang cuahmahmi Rome cozah nih Jew miphun Independence hmuhter ding in an rak hnengh lengmang cang hna. 

Independence an hmuh hnuah Mattathias fale nih Jew miphun cu an uk hna. Hasmonean Dynasty ti zong in an auh hna. Hasmonean cithlak hi Zadok cithlak (Num. 25: 10-13; Ezek. 40: 46; 48: 11) an si lo nain tlangbawi rian zong an tlaih chih. Caan zeimawzat a vun kal in an rak dohmi Hellenistic nunphung an zul colh. 142 B.C - 63 B.C chung vialte Jew miphun cu hi chungkhar nih Greek phung in an hruai hna. Asinain anmah chungah Aristobolus II le Hyrcanus II karlak ah fak tuk in tlangbawi cuhnak a um caah 63 B.C ah Rome ralbawi Pompey nih a rak tlangtlak hna i, Palestine cu Rome uknak tangah a tla than (Dan. 2: 40; 7: 7). Dong loin Jew miphun chungah nawlngaihnak cuhnak a um lengmang caah Rome nih Herod the Great cu Judea siangpahrang ah an chiah. Herod the Great hi Jew miphun si loin Idumean miphun a si i, Jew miphun ah aa thlengmi a si. 37 B.C - 4 B.C chung Palestine a uk hna. Jesus Khrih a chuah tiang ah Herod the Great cu Jew miphun siangpahrang a si (Matt. 2: 1,2).

Jew Miphun Thanchonak

Diaspora: Jew miphun thencheunak pahnih a um. Chak le thlang tiin Israel cu a kuai i, pakhat cu Israel an si i, Assyria nih sal ah a lak hna (1 King 17: 23); pakhat cu Judah an si i, Babylon nih sal ah a lak hna (1 King 25: 21). Sal in an luat hnu tiang ah an ram ah a kir lomi tampi an um. Rome pennak chung kip an um hna i, Greece pennak chung kip zongah an um hna. Biakam Hlun le Biakam Thar karlak ah hin an ramchung ummi naak in miphun dangdang sinah a ummi an tam deuh. Nihin tiang ah vawleicung ram kip ah Jew miphun an um rih hna. 

Phungbia cawnpiaktu hna: Assyria le Babylon sal an tan hnuah Jew miphun nih an i fian tukmi cu Torah kan zulh lo ruang le Torah kan theihhngalhnak a tlawm tuk ruangah Pathian dantatnak kan tong timi an theih. Biatak tein Biakam Hlun Bible (Torah) cawnnak le lehlanak an thok than. Kum 400 chungah hin phungbia cawnpiaktu saya timi tampi an chuak. Biakam Hlun Bible hrilhfiahnak ah anmah hi nawlngei bik ah ruah hram an thok chan zong a vun si. Israel miphun cawnpiaktu zong an vun si. 

Synagogue: 586 B.C ah Babylon nih Jerusalem biakinn an hrawh tikah sal an tannak kip ah Synagogue hi an cacawnnak le an biaknak inn ah a cang. Sal in an luat hnu tiang ah Jew miphun tampi cu an kir hna lo. An umnak ram kik ah Synagogue an ngei dih. Zerubbabel nih 516 ah Jerusalem biakinn a sak than hnu hmanh ah Synagogue an ngei rih hna. 

Septuagint: 330 B.C in cun Greek holh an hmang cang hna. Ram kip um Jew miphun nih an hmanmi cu Greek holh a si cang. Jew mi tuanbia ah a ummi cu 250 B.C ah Ptolemy Philadelphus nih 72 scholar a auh hna i, ni 72 chungah Biakam Hlun hi Greek holh in a lehter an ti. Egypt khuapi a rak simi Alexandria ah a rak si i, Biakam Hlun kha Greek holh in ahopaoh nih an rel khawh cang. Septuagint hi Latin holh in sawmsarih timi kha 'Septuagint' an auh. 

Pharisee: Pharisee an i thoknak hi Maccabees chan ah a rak si i, Greek nunphung a rak duh lomi an si. 'Holy Ones' (mi thiang) tiah an an i au. Jew miphun nih Seleucid dynasty pennak in Independence an hmuh tikah Hasmonean Dynasty nih Greek nunphung an rak zulh.  Asinain Hellenism a duh lomi paoh kha a dang tein bu an chuak i, pharisee tiah theih an si. An nawlbia, tradition le an phung kha fek tein an i tlaih i, biaknak thisa thuk piin an ngei. Cu tikah Palestine mipi sin in thangthatnak an tong khun. 

Sadducee: Sadducee nih Zadok cithlak kan si i an ti i, tlangbawi rian hi kanmah nih kan tuaan awk a si an ti. Greek nunphung aa tlaih i, Jew miphun chungah mirum le thil ti kho ngaimi an si. Jerusalem biakinn phung le lam kilvengtu kan si an ti. Biakam Hlun hi Bible a si tiah an cohlang lo; Torah (Genesis - Deuteronomy) tiang lawng hi an cohlan. Torah leng i cawnpiaknak poah cu an cohlan duh lo. Thawhthannak tbk tiang in an zum lo (Lamkaltu 23: 6-8).