Minthang zong a si i, mipi nih zohchomi nu-va zong a simi Brad Pitt le Angelina Jolie cu fa paruk a ngeimi an si. Asinain ruah lo tuk in September ah khan Jolie nih thennak ca court ah a chiah. Zei ko dah a si hnga tiah vawleicung khuaruah in an tuah.
A hnuah thawngpang a vun fiang chin lengmang i Brad Pitt hi pacan dirhmun ah a chambau tiah Jolie nih a chim. Chungkhar kongah kan hmuh ning aa dang tuk tiah Jolie zong nih a chim chih. A zual deuh rihmi cu private vanlawng in an zuan lioah Brad Pitt nih a fapa kum 15 Knox hi ningcang loin a tuahto ti a si.
Cu ruangah a konglam biatak tein hlat zong a tong. Brad Pitt nih a fapa Knox cungah a tuahto ning hi zei tiang dah a si timi biatak tein Los Angeles County Department of Child and Family Services nih an hlat.
FBI zong nih zoh thannak tha tein an tuah hnuah Brad Pitt nih sualnak a ngei lo tiah fehternak an tuahmi cu FBI biachimtu nu Laura Eimiler nih a chim. Pitt leiin zeihmanh bia a chuak rih lo. An fale cu Jolie zohkhanhnak tangah an um lio a si, Brad Pitt nih zong fale zohkhanhnak ah kaa tel ve lai tiah a hal lio hna a si. Ref: CNN.