Hillary Clinton cu a e-mail kongah atu le atu ti awk in harnak le minchiatnak a tong. Secretary of State a tuan lioah cozah riantuannak thlithup kongah amah pumpak e-mail a hman pinah thlithup thil (classified information) lengah a chuahter lengmang.
Cozah thlithup thil lawng nih hnahnawhnak pe loin a e-mail lengchuahnak nih a riantuannak chung thil tampi a langhter fawn. Cu tikah a min a chia tuk i, mipi nih an zum kho hrimhrim ti li. Khatlei in FBI nih hlathlai lengmang zong a tong i, a hnuah cun a tlaknak tiang a phakter.
Mah naak in a tihnung deuh rihmi cu President thimmi Donald Trump nih campaign an tuah lio le debate an tuah lioah 'president ka tlin ahcun na e-mail hlathlai ding in lehlatu bu ka ser lai i, thong ah kan thlak lai tiah a hrocer. Teinak a hmuh tiang ah mipi nih 'thong ah thla' tiah an au hnawh.
Lehlatu bu an sermi nih a e-mal kong an hlat taktak ahcun thongtlaknak tiang a phan khomi a si. CBS 60 Minutes nih biahalnak an tuah lioah Trump cu an hal than i, a let duh hna lo. A dang kong tu kha biapi in a chimh hna. Asinain mipi nih cun Clinton hi zeitin dah a tuah te hnga timi hi zoh pengmi a si.
Tu chun ceo lawngah zeitin dah Trump nih Clinton kong a ruah timi a hung fiang. Trump campaign manager Kellyanne Conway nih a chimmi cu Trump cozah team nih Clinton e-mail kong a siah Clinton Foundation kong a siah zeihmanh hlathlainak kan tuah lai lo tiah a chim. Clinton kongah fianternak an vun tuah colhmi nih mipi lungthin zong a damter lai i, Clinton le a chungkhar lungthin zong a damter cang lai. Ref: CNN.