President thimmi Donald Trump nih Hillary Clinton a vun tei cu vawleicung an lau i, an khuaruahar dih. Campaign chungah khan cun a phunphun in mipi bia a kamh hna i, bia thatha a chim. Asinain a chim bantuk a si lo timi an fiang chin lengmang.
1) Clinton E-mail kongah hlathlatnak tuahtu bu ka ser lai i, thong ah a kal lai a rak ti. October ah khan a voihnihnak debate an ngei i, president ka tlin ahcun biaceihtu bu ka ser lai i, hlathlainak an in tuah lai a ti.
Asinain teinak a hmuh tikah biaceih ding in Clinton ka timhmi cu kan tuah than lai lo tiah New York Times ah chim. Clinton harnat pek ka duh ti lo. A lam phun kip in harnat a ing i, a tuar tuk. Harnak ka pe ti lai lo tiah Trump nih a chim.
2) Gay Marriage kongah biaceihtu ka khanh hna lai i, Gay Marriage hi kan hrawh than lai a ti. Supreme Court ah biaceihtu ka chiah hna lai i, kan letter than hna lai tiah a chim, asinain teinak a hmuh tikah bia dang a chim than.
60 Minutes nih biahalnak an tuah lioah Trump nih a chimmi cu 'Supreme Court ah phisin cangmi a si caah keimah nih tuah awk ka ngei ti lo a ti than. Supreme Court nih bia an chah cangmi kha a tha ngaiin ka ruah ko tiah a chim. Zeihmanh tuah a tim ti lo.
3) Obamacare kong zong fak ngaiin a rak chim. Kan ram caah vanchiat thil pakhat a si a rak ti. President ka tlin ahcun a rannak in kan hrawh than lai a ti. Asinain President a tlin cangka in a biachim aa dang than. Tlawmpal lawng kan remh hna lai, a dangdang cu amah ning tein a um ko lai a ti.
4) Vampang kong zong hi fak piin a rak chim. President ka tlin ahcun US-Mexico ramri karlak vampang in ka chon lai a ti. Vampang chonnak ah Mexico zong nih tangka an pek lai a ti. Asinain President a tlin cangka in a bia aa dang than.
60 Minutes nih biahalnak an tuah ah khan vampang kong naak in hauhruang sak deuh kha a chim cang. Hmun zeimawzat ah cun hauhruang tu hi a tha deuh lai. Ka thiam tukmi a si tiah a chim.
5) Tapung Hremnak kong zong fak ngaiin a rak chim. President ka tlin ahcun tapung or lunghrinhmi hremnak caah titoih hi kan hman than lai a ti. Puan chah piin an hmai an khuh hna i, ti an toihmi hremnak phung kha ka ser than lai a ti.
Asinain President a tlin cangka in a chimmi aa dang than hoi. Ralkap lei upa thing James N. Mattis a ton i hremnak ah titoih phung hi cu rian a tuan ti lo tiah a chimh. Trump nih a chim vemi cu 'san a tlai in ka hmu bal lo' tiah a chim. Mattis nih 'kuak le beer tlawmpal ka pe law tha deuh ka tuah khawh lai' tiah a chim.
A cunglei panga hi Donald Trump campaign biatung le tawhtlaitu an si. Mipi nih an duh tuknak le an uar tuknak zong an si. Asinain a vun tlin taktak tikah cun phun dang in a chim than cang. Zumh awk hi a tlak taktak te hnga maw?