Min
Matthew sullam cu 'Bawipa laksawng' ti a si i, a min dang pakhat cu Levi (Mat. 9:9) ti a si. Matthai hi ngunkhuakholhtu a si nain a ngeihmi vialte kaltak in Jesuh Khrih a zul i, Lamkaltu hleihnih lakah aa telmi pakhat a si (Luke 5: 27,28; Mat. 10: 3; Mark 3: 18; Luke 6: 15; Lamkaltu 1: 13). Amah hrimhrim nih fiang tein Lamkaltu hleihnih min a tialnak ah amah cu 'ngunkhuaikholhtu' (tax collector) tiah aa tial. A hawile nih a min an chim tik poah ah a min thing Levi lengmang an hman; a nun ning thing an chim tik paoh ah an hman deuh ve. A nun thing le a min hlun hi a then bal lo; Matthai nunnak ah tangdor nun a ngeihnak langhtertu a si. Thawngtha cauk dangdang hna bantukin Matthai Thawngtha cauk zong amah min in tial le theih a si.
Khrihfami tuanbia hramthok tein Matthai cauk hi Matthai tialmi a si tiah zeihmanh alnak um loin cohlan a rak si. Pacan Origen (ca. A.D. 185-254) nih a rak tialmi Pacan Eusebius nih a tanglei bantukin a tial: 'Pathian Khrihfabu nih kan rak ngeihmi Thawngtha cauk pali lakah pakhat hi kan tradition nih a kan chimh ning ah cun Matthai nih a tialmi a si. Amah hi ngunkhuaikholhtu a rak si i, a hnuah Jesuh Khrih Lamkaltu a si. Judaism in aa thlengmi hna caah a rak tialmi a si' tiah a tial (Ecclesiastical History, 6:25). A.D. 70 i, Jerusalem Biakinn hrawh hlanah hin Matthai hi rak tialmi a si. Cheukhat scholar hna nih cun A.D. 50 hrawngah a tialmi a si an ti.
Background
Matthai cauk hi zoh tikah Jew miphun zawnruahnak in tialmi a si tihi fiang tein theih khawh a si. A hramthok i chanrelnak a tialmi in a fiang colh. Jew miphun chungin pacan le nuncan timi hna min in a tial lengmang i, Abraham tiang a phan. Luke he kan tahchun hna ahcun Luke nih cun Jesuh Khrih hi miphun vialte khamhtu a si ti kha langhter a duh caah Adam chan tiang a langhter. Matthai nih cun Jew miphun huap tiang lawng in a langhter ve. Jesuh Khrih hi Israel Siangpahrang le kamhmi Messiah a si ti kha langhter a duhmi a si. Matthai nih Biakam Hlun biaphuan sawmruk leng a lak i, Jesuh Khrih hi kamhmi tlinnak a si tiah fiang tuk le thawng tuk in a langhter.
Jew miphun zawnruahnak he a tialmi a si ti a fian kun thannak cu Jew miphun phunglam a chim lengmang, asinain fianternak a tuah bal lo. Ka cauk reltu nih an fiang dih cang timi ruahnak he a tialmi a si zong kha a fiang. Thawngtha cauk dang nih cun fianternak an tuah lengmang (cf. Mark 7:3; John 19: 40). Atu le atu tiawk in 'Jesuh Khrih hi David fapa a si' tiah a chim (Matt. 1:1; 9: 27; 12: 23; 15: 22; 20: 30; 21: 9, 15; 22: 42, 45). Jew miphun phung le lam a theih tuk ruang le ka miphun hawi thin ka hunter sual hna lai tiah Pathian min hmanh chim loin ''Vancung Pennak' tiah a hman lengmang. Thawngtha cauk tialtu dangdang hna nih cun 'Pathian Pennak' tiah fiang ko in a langhter dih. A tial duhmi tlangpi zoh hna tikah Biakam Hlun nih a chim cangmi lawng an si i, Messiah ruahchannak kan ngeihmi vialte hna kha Jesuh Khrih ah an tling dih cang tihi a cauk muru a si.
Matthai nih Greek a hman ning zoh tikah amah cu Palestine Jew a si kha a fiang i, a tial hnawhchanmi hna hi Hellenistic Jews an si zong a fiang. A tialmi vialte hna hi a hmutu pakhat dirhmun zong in a langhter i, Jesuh Khrih riantuannak le biachim vialte hna hi zumh awktlak an si ko ti kha al awk um loin a langhter. Jesuh Khrih hi kum-caan sau pi kan hngahhlaang cangmi Messiah a si ko ti zong a langhter i, Biakam Hlun charhchan in tampi an chimmi nih hin kamhmi Messiah le Biakam Thar Jesuh Khrih hi pakhat an si -- aa khatmi an si ti zong a langhter (e.g., 2: 17, 18; 4: 13-15; 13: 35, 21: 4, 5; 27: 9, 10).
A Theology Tlangpi Hna
Matthai nih Jesuh cu kamhmi Messiah le Jew miphun Siangpahrang hrimhrim a si ko ti langhter a duh bantukin a Thawngtha cauk cu Biakam Hlun ah Pathian nih Pennak a kamhmi hna Bible caang in an khat. 'Vancung Pennak' timi biafang hi sawmthum le pahnih a hman. A hramthok i chanrelnak a langhtermi nih Jesuh Khrih cu Jew miphun Siangpahrang a si ko ti kha a langhter i, a dongh tiang Jew miphun Siangpahrang a sinak kha a fianter. Matthai nih fiang tein Jesuh Khrih chungkhar chanrelnak in a langhter i, Siangpahrang chungkhar a si zong a langhter. Biakam Hlun nih a chim cangmi Siangpahrang taktak ding cu Jesuh Khrih hi a si ti zong a langhter.
Matthai nih Jesuh biachimmi panga biapi ngaiin a langhter: 1) Tlangcung Cawnpiaknak (Dal 5 - 7); 2) a Lamkaltu Thawngtha chim a thlaknak hna (Dal 10); 3) Vancung Pennak tahchunnak a chimmi hna (Dal 13); 4) Hngakchia bantukin zumh kan herhnak (Dal 18); cun 5) a voihnihnak rat thannak kong (Dal 24, 25). Hi bia a chim dih hna kip ah ''hi bia a chim dih hna tikah' timi Matthai nih a tial lengmang (Matt. 7: 28; 11: 1; 13: 53; 19: 1; 26: 1).
Jesuh Khrih le Farasi dohnak zong hi Matthai Thawngtha tlangpi pakhat a si fawn. Asinain Matthai nih a Thawngtha reltu hna caah thahnem seh tiang fiah tein Farasi palhnak kha a langhter. Sadusi hna kong zong Thawngtha cauk tialtu dang hna naak in tam deuh in a langhter. Farasi le Sadusi cawnpiaknak hi 'thilnu' bantuk an si caah nan hrial hna lai tiah fak piin a tial (Matt. 16: 11, 12). Hi hna pahnih hi an zumhnak aa dang tukmi an si nain Jesuh Khrih an huatnak le an dohnak ah cun hmun khat ah an um.
Jesuh Khrih an hlawtnak zong hi Mathai Thawngtha tlangpi pakhat ah aa tel rih. Farasi le Sadusi nih Jesuh Khrih an dohnak hi Thawngtha cauk dangdang nih an tialmi lakah Matthai tialmi a fak bik. Egypt an zam pinak in vanlam cung a thihnak tiang ah Thawngtha cauk dangdang nih an langhtermi hna naak in Matthai nih fiang khun in a langhter rih. Matthai nih vailamtahnak kong a tialmi ah mifir sualngaihchih a um lo, hawikom a ngei lo, vailam tung hram zong ah dawtu an um hna lo, A thih tikah Pathian tiang nih a hlawt (Matt. 27: 46). Sihmanhsehlaw Matthai nih cun thawnnak le sunparnak he khuadawm cung in a ra than ding teitu Siangpahrang le zungzal in a kan um pitu Pathian tiin a donghter (Matt. 24: 30; 28: 20).