Kan ramchung security himnak kongah Security Council meeting an thut ding a si cang tiah USDP hruainak in Party 13 nih thanhca an chuah cang. Kahdohnak a siah Rohingya buainak a siah kan ram a him ti lo tiah an tial chih.
Kan buainak hram cu ramchung in a siah ramleng in a siah tapung bu he aa pehtlaimi an si tiah a tial chih. Yangoon bompuahnak le a tam chin lengmangmi sualnak hna nih hin kan ram economic a harter, daihnak kan duhmi a hrawh chin lengmang, kan security caah tih a nunter chin lengmang tiah Party 13 nih an chim.
An min le bu chim loin an langhtermi cu 'ramchung in a siah ramleng in a siah kan ram runvennak thazaang derter ding in riantuannak le cawlcanghnak a um' an ti. Atu lio kan cozah zong harsatnak chungah a lut chin lengmang tiah an chim chih.
'Cucaah kan security a siah economic a siah ramchung in a siah ramleng in a siah tapung riantuannak in kan i runven khawhnak ding le biachahnak hmaan kan chuah pi khawhnak ding ah cun National Defence and Security Council Meeting kan tuah zokzok a hau' tiah an tial chih.
NDSC chungtel ah hin President aa tel, vice president pahnih an i tel, parliament biachimtu pahnih an i tel, ralkap lutlai le a deputy an i tel, ministers of defence an i tel, boarder affairs an i tel, home affiars an i tel, cun foreign affairs an i tel. State Counsellor Daw Aung San Suu Kyi zong aa tel ve.
NDSC Meeting auhnak ah aa temi Party 13 chungah NLD party an i tel lo. President office leiin U Zaw Htay nih a chimmi cu 'Party 13 nih an chim bantukin kan ram hi mah tluk cun a thinphangmi dirhmun ah a um lo. Kan cozah nih a si khawh chungin kan buainak kong hi a phisin cuahmah lio a si ko' tiah a chim.
Kan ramchung buainak le harsatnak 'General Crisis' tiah an auhmi hi cu an porhhlei tuk bia a si tiah a chim chih. Ref: MT.