'Kut-ke ngei lo evangelist' tiah vawleicung minung nih an theihmi khuaruahhar a simi Pathian sal pa Nick Vujicic cu America ram kip thongtla hna sinah Pathian thawngtha bia a chim cuahmah lio a si. America ram chung i thonginn 601 tluk nih ruahchannak thawngtha bia ngaih dingmi min a thut cang.
State 21 chungah thonginn 601 nih Nick thawngtha bia ngaih ding in min an thut cang i, State pariat zong nih a duhnak an langhter i, an i telnak ding ah thlacamnak in thei cio hna u sih' tiah Life Without Limbs Ministry nih nikhatni ah a facebook ah a tial. Nick hi vawleicung ram kip ah ruahchanak thawngtha phurtu a si.
Texas, New Boston i Telforh Unit Thonginn ah Nick nih ruahchannak thawngbia a chimh lio hna ah a chimmi cu 'ke ngei lo le kut ngei loin nan hmaiah ka dir, kan chimh hna ka chambau hrimhrim lo. Theihter kan duhmi hna cu thonginn chung nan um ruangah Jesuh Khrih ah luatnak ka hmu lai lo ti i ruat hlah u' tiah a chim hna.
Thonginn dang pakhat ah a kal i, a sual takmi pa nih khamhnak a hmuhnak kong a chimh hna. A sual tukmi pa cu thonginn chungah Jesuh Khrih a zumhnak in hrinthannak a co i, mi luat ah a cang, asinain thonginn congtu cu a duh tik poah ah inn a tin kho ko nain mi luat a si lo zeicatiah Jesuh Khrih a zum lo a ti hna.
A kalnak le Pathian bia a chimnak hmun kip ah thazaang laknak, thanghnak le luatnak a um. Thonginn kip a kalnak zongah luatnak a um lai timi zumhnak a um.
Nai thla hrawng kha Europe ram a tlawng hna. Europe ram a tlawnnak kip i Pathian bia a chimnak hmun kip ah Pathian khuaruahhar riantuannak aa phuang i minung tampi nih hrinthannak an co.
A facebook ah a tialmi cu 'hawikom hna, Good morning, zahan zan cu khuaruahar a si ko. Minung 5,000 tluk hrawng kan i pum i, 60% hrawng nih Jesuh Khrih cohlan awk ah an dir' a ti. A peh thanmi cu 'Ukraine cozah upa hna he zong in tonnak kan ngei lai i, ruahchannak thawngtha bia kan chim lai' tiah a tial chih.
A hnu deuh ah a facebook ah a tial thanmi cu 'Slovenia president he kan i ton dih bak a si. Thazaang tampi kan la. Thaizing hi Slovenia sianghngak sinah ka chim lai. Thlacamnak in kan bawm u. Thla nan kan campiaknak, nan kan dawtnak le nan kan dirkamhnak cungah kan i lawm' a ti. Ref: CP.