Ningani tiang ah ISIS le cozah lei ralkap karlak ah raltuknak a fak chin lengmang tiah khuami an chim. Cozah lei ralkap zong hliamhma a tuarmi an tam i, zohkhanhtu doctor zong an i deih lo. Raltuknak vanlawng nih cunglei in a rak phomh thluahmah ve hna.
Zohkhanh colh a hau timi paoh kha usape in an zoh hmasa hna. Asinain minung pakhat nih ka hma a dam cun ISIS ka doh than rih hna lai. Kawika an umnak paoh kan dawi hna lai zeicatiah ISIS hi minung an si i lo; minung caah tihnung an si a ti.
Khua chung minung nih an chimmi cu ISIS nih phone a ngeimi paoh an kah hna i mipi ralrin peknak caah tiah lam kip ah an ruak an chiah hna tiah CNN sinah an chim. Tu zarh chungah minung 60 an thah hna tiah UN Human rights nih an chim.
ISIS nih mino tete an lak hna i an thluak an tawl hna, training an pek hna. ISIS ralkap nak hmanh in tih an nung deuh. Thih tih lo tiang in an cawnpiak hna tikah tih an thei ti lo; ramdawtnak thisa kan ngei an ti i an tuah ngam lomi a um ti lo tiah khua chungmi nih an chim.
An hruaitu nih an zam tak hna i ralsa ah an terh hna tiah a chim chih. Nihnihni ah khan ISIS senior hruaitu Al Nuaimi an thah tiah Iraq sungthoh lei nih CNN ah an chim. ISIS nih a thihnak vedio an vun langhter i raltuknak ah a nunnak aa pemi tiah an thangthat. Sadam Hussein sungthoh ah rank sang ngai a rak tlaimi a si tiah CNN nih a chim chih.