Pathian nih a kan kamhmi cu nan tuar khawh lo tiang in nan cungah tukforhnak tlunter ka duh lo a ti. Kan tei khawh lomi tiang in tukforh a tlunter lo. Cheukhat cu tukforhnak nih fawi tein a teimi an um i, a doh hrimhrim an doh lo; a chungah an lut ve. Asinain ding tein a nungmi nih cun an tei lengmang ko. Tukforhnak he biatak tein an i peih caan hmanh ah an tei khawh than lengmang. Pathian an i bochan ruangah teinak an hmu lengmang.
Bible nih tukforhnak hi doh u a kan ti bal lo. Satan or mi thalo pa tu kha doh u a kan ti. Tukforh le Satan hi aa dangmi an si. Tukforhnak timi cu kan chung in aa sermi a si. Kan lungthin in maw kan mit in maw kan hnakhawh tbk in aa thok. Doh awk a tha lo. Amah tu cu tukforhnak kan si tikah thil dangdang ah khan kan ruahnak kan mer colh a hau i, kan mit kan thial colh a hau i, kan hnakhaw kan phih colh a hau. Kan mer tak colh lo i, kan doh ahcun a zual chin lai i, kanmah nih tei loin a kan tei lai.
Tachunnak in kan chim ahcun, kan ruahnak ah sual duhnak a thawh tikah kan doh ahcun thuk pi ah a pil chin lai i, kan ruahnak ah a khat in a khat dih lai. Doh cu thawnter chin a si. Tukforhnak zong cu bantuk cu a si ve. Kan feeling hna hi kan doh deuhdeuh tikah a kan tei deuh. Cucaah tukforhnak aa thoknak cu kan ruahnak in a si caah a doh in doh loin kan ruahnak kha a dang thil ah kan thial colh a hau. Sualnak ka ruah cuahmahmi kha a tha ti lo ti ka theih cangka in tiva kalnak kong hna ah khan thial colh ding a si. Cuticun tukforhnak kan teinak cu a si.
Sualnak kan teinak le kan sunghnak hi kan ruahnak cungah aa hngatmi a si. Kan ruahnak a kan tei kho paoh kha a kan teitu a rak si. JOb nih a chimmi cu 'hor duhnak lungthin he nu ka zoh sual lonak ding ah ka mit he biakamnak ka ser' (Job 31:1) a ti. David nih 'san a tlai lomi thil ah khan kaa mer sualnak lo ding ah ka veng' tiah thla a cam ve.
Cucaah Tukforh kan si tikah doh loin kan ruahnak kha mer i thil dang tu kha kan ruah a herh. Thil dangdang ah kan ruahnak kan mer tikah tukforh thawnnak thazaang vialte kha an tlau dih colh. A caan ahcun kan TV zong phih a hauh caan a um; a caan ahcun kan hawile zong kan hrial an hauh caan a um; a caan ahcun mi kong a ceih cuahmahmi kan hrial a hauh caan a um. Khuai nih a kan seh lai ti kan theih ahcun kan hrial a hau. Kan ruahnak hi minung kan nunnak ah a man sung tukmi a si. Kan ruahnak a thur i, a rawh cang ahcun fawi tein remh khawh a si ti lo. Minung kan rawhnak le kan tlaunak hi kan ruahnak a tlau cang ruangah a si. Cucaah kan ruahnak thianghlim te le him tein kan chiah peng khawhnak ding ah cun Pathian bia in kan khahter lengmang a hau. Bible a rel lomi kan si hmanh ah Pathian dawtnak le thatnak kan ruah lengmang a hau. Kan riantuannak zong ah kan ruah ding a si; kan ih pah zong ah kan ruah ding a si; kan len pah zong in kan ruah ding a si.
Paul nih 'thil thalo kha thil tha in tei khawh i zuam lengmang u' tiah a kan fialmi cu hihi a si. Kan ruahnak kha thil tha in kan khahter cang ahcun Satan nih hmunhma a ngei kho lai lo. 'Jesuh ah khan nan ruahnak kha chia u' tiah Hebrew catialtu nih a kan fial i, Paul zong nih 'thangthat awk a tlakmi thil tha khan nan ruahnak kha khahter hna u, cu hna cu a hmaanmi, duh a nungmi, a dingmi, a thiangmi upat awk a tlakmi' hna kha an si.
Note: Rick Warren cauk the Purpose Driven Life timi chungin ka duhnak tawi tein ka langhtermi a si.