Nithumni ah Iran hruai pahnih President Hassan Rouhani le Iran Supreme leader Ayatollah Ali Khamenei nih US thimnak kong le Iran nuclear deal (hnathlaknak) tuahmi kongah hrocernak bia an vun chim.
US president caah Donald Trump an thimmi nih nuclear kongah hnatlaknak kan sermi zeihmanh a dawn hlei lai lo. US thimnak nih zeibantuk resulh a chuah pi zongah Iran nih ram thawng hna he nuclear biakamnak le hnatlaknak kan tuahmi a hrawk kho lai lo tiah an pahnih in an chim.
Iran hi nuclear hriamnam a ser i, aa lim deng cang lai tiah ruahmi a si. Israel zong nih kah ding in fak ngaiin a rak hro lengmang cang. Asinain vawleicung ram thawng hna nih Iran nuclear kongah hnatlaknak an tuah pimi cu nuclear ser hi ngol law economic dantatnak kan in khinhmi in kan in luatter hna lai an ti hna.
Iran nih a cohlan hna i nuclear deal timi hnatlaknak le minthutnak an tuah. Israel cu a thinhunter ngai. Iran nuclear sernak lam sialpiak bantuk a si an ti. A tuanh le a tlai lawng pei a si ko lai cu tiah Israel lung a fak ngai. Tutan US thimnak ah Trump nih a chim tawnmi cu Iran le superpower ram pawl hnatlaknak tuahmi hi ka cohlang lai lo a ti.
Iran President Rouhani nih a chimmi cu 'US President atu le atu an i thlen zongah Iran duhnak cu zeihmanh a thleng hlei lai lo. Hnatlaknak kan tuahmi hi kan i tlaih peng ko lai' a ti. Trump min cu a chim lo nain 'vawlei hi minung pakhat le party pakhat tangah a ummi a si lo. Vawlei tu nih hin extreme tuk in a ummi tu hna kha thil tampi a khinh lehlam hna a ti.
'Iran hi lente an celh pi ding a si lo' tiah a chim chih. 1979 in Iran le US hi diplomatic pehtlaihnak an ngei ti lo. Iran sianghngakchia raltho hna nih Iran i US Embassy cu an rak bauh i American 52 an rak hren hna. US nih Iran hruaitu Mohammad Reza Pahlavi cu Iran ah a kong ceih ding in an rak pek duh hna lo caah US minung 52 cu ni 444 chung an rak hren ve hna. Ref: TOI.