Ningani zan i Richard Rodgers Baisakawp Zung ah Hamilton hlasaknak puai an tuahnak ah vice President Mike Pence le a fanu le a tunu tiin an kal ve. Baisakawp (zohsin zung) an phak ah mipi nih lunglawmhnak he 'boo' he an rak au hnawh hna.
An puai dongh leiah actor Brandon Victor Dixon nih Mike Pence min char in mipi sinah a chimmi cu 'kan zapi caah riantuanmi a si' a ti. A chim thanmi cu 'Sir, a thinphangmi miphun kip aa cawhmi America hi nan cozah nih nan kan runveng sual lai lo ti kan phang' a ti.
A chim than rihmi cu 'kan fale, kan vawlei, kan nu le kan pa le kan covo hi nan kan runvenpiak sual hna lai lo' ti kan phang tiah stage cung in a rak ti. Mipi nih an rak thangthat i an au dih hna. Asinain Dixon biachim a dih hlanah Mike Pence cu a chuak.
'Vice President a si i kan ram hruaitu ding zong a simi nan tuahto ning aa dawhcah lo tiah President thimmi Donald Trump nih Mike Pence hi ngaihthiam an hal lai tiah Tweet ah a tial.
Trump nih a chim thanmi cu 'Zahan zan ah kan hmailei vice president a si dingmi nan tuaitam. Ngaihthiam nan hal lai. Hi bantuk thil hi a um awk a si lo. Baisakawp zung cu a him i, hmun tha a si awk a si. Mi tha a simi Mike Pence cungah nan ziaza aa dawhcah lo tuk' tiah nirukni zing ah Twitter ah a tial.
Dixon nih a lehmi cu 'bia kan ruahmi cu tuaitam a si lo. A dir i kan bia a ngaihmi cungah kan thangthat tuk' tiah a ti ve. Hamilton hi music leiin laksawng a hmu cangmi a si. America dirhtu hna pacan pakhat a simi Alexander Hamilotn konghe aa tlaimi hlasaknak a si. Ref: VOA News.