Russia bawmhnak in Syrian ralkap nih Aleppo khua a chimh dih i, an lak. Mah ruangah Russian ambassador Mr Karlov cu mipi hmai i bia a chim lioah Turkey police Mevlut Mert nih hnulei in thih lak in a kah. 'Aleppo philh hlah' tiah a ruak kam ah a dir i a ua.
A nupi Marina zong a pasal bia a chim lioah mipi lakah a dir ve. A kaptu umtu le cawlcangh zong videio in zoh khawh a si. Ambassador hnulei ah a dir i, caan zeimawzat a rauh in a pistol aa chuah i a kah colh. Mipi zong an lau tuk i an zam dih. A hliamh chihmi pathum an um. A nupi Marina zong a tlu colh ve.
A chimmi cu 'midang lakah keimah zong tuang ah ka tlu colh ve. Minung kan tam pi hna i, kan lau dih hna. 'Keimah le keimah kaa theih than cu sizung kan kal lam ah a si. Ka pasal cu a rak thi diam cang tiah ka ruah. Voi hlei khat a kah. Ka lau tuk i, shok ka ngah i keimah le keimah zong kaa thei ti lo' a ti.
Turkey police nih minung paruk an tlaih hna. A kaptu pa chungkhar zong an tlaih hna. Turkey riantuantu upa nih an zumh ning ahcun US ah a zammi Gulen hnuzultu an si tiah an zumh. Gulen hi naite i Turkey ralkap nih cozah lak an timh i an lak khawh than lomi ah khuakhangtu a si an ti. Turkey cozah zong nih Gulen hi kan kua u an ti ko nain US nih an duh lo.
Asinain a kah khawh ah a au len i, a chimmi bia hna hi Gulen hnuzultu naak in Syria cozah dohtu raltho he aa pehtlaihmi a lo deuh an ti. Turkist holh in a aumi cu 'Aleppo philh hrimhrim hlah, Syria philh hlah. Kan peng le kan sam an him hlan chung paoh cu nan him lai lo' a ti. A donghnak a aumi cu 'thihnak lawng nih kahin a ka lak khawh lai'a ti.
Russia President Putin zong an thinphang chin lengmang. A pumpak security a siah ramchung security an siah ramdang an embassy security a siah kan thawnter chin lengmang a hau a ti. ISIS zong nih ram kip Russia embassy kan ral lai tiah an phuan ve. Ref: The Sun.