Ramchung ral nih a den i, harnak dong loin a tongmi Syrian hngakchia hna cu Real Madrid Star Cristiano Ronald nih 'nan lungdong hrimhrim hlah u' tiah thazaang peknak ca a kuat hna. 'Save The Children' ah ambassador a simi Ronaldo nih zeitluk in dah hngakchia zawn a ruah hna timi a lang.
Syria cu ramchung ral nih fak taktak in a hrawh i, a hleiin Aleppo khua ko hi a zualhma khun. Lungdong le ruahchannak ngei loin Syrian hngakchia le mino nih caan an hman lioah Cristiano Ronaldo nih bia a cahmi hna cu 'nan ruahchannak dong hrimhrim hlah u, hmailei cuan in zumhnak ngei peng ko u' tiah a ti hna. Hmaan aa thlak i 'hihi Syrian hngakchia hna caah a si lai' tiah a tial.
'Nan temtuar ning hi zeitluk in dah a fah i a har timi kan theih dih. Keimah cu bawlung chuih ah minthang ngai ka si ko nain nanmah tu kha minthang taktak cu nan si. Nan lungdong hrimhrim hlah u. Vawlei pi nih an um pi ko hna. Nan zawn zong an in ruah ko hna. Keimah zong nih kan um pi zungzal hna' tiah a tial.
Cristiano Ronald thazaang peknak bia an theih cio tikah vawleicung minung zong an lung aa lawm tuk. 'Save The Children' organization hruaitu Nick Finney nih a chimmi cu 'siang ngaiin Cristiano Ronaldo tangka hlutmi nih Aleppo le Syria ramchung kip hngakchia a dirkamh hna lai. Hngakchia nih an ton lo dingmi an tonmi hi a har tukmi thil a si' tiah a chim.
Ronaldo cungah kan lung aa tlawm tuk hringhran. Sport leiah vawleicung minthang bik lawng si loin vawleicung ram kip hngakchia vialte hna caah ruahchannak meiceu phurtu a si. Ruahchannak hi Syrian hngakchia zong nih an herh chin lengmangmi a si' tiah a chim chih. Ref: The sun.