Nilini ah President Obama nih fak deuh in Russia lehrulnak a vun tuah cang hna. 2016 thimnaak ah aa tel tiah zumhmi diplomats minung 35 cu US in chuak u tiah nawl a chuah. Russia zong nih kan lehrul ve lai tiah an vun ti colh.
Obama le a cozah nih Russia pali cu cyber riantuannak kongah dan a tat hna i minung panga cu thimnak ah thlithup riantuan an si tiah dan a tat hna. Minung 35 cu US in chuak u tiah a thawl hna. Russia embassy zung he aa pehtlaimi pahnih a kharter chih hna.
E-mail hacking ah aa telmi Russia official dantatnak a voikhatnak a si. Mipi theih in dan a tatnak a voikhat zong a si. Russia cyber thlithup riantuannak hi thimnak phichuak thlen duh ah a si. Inn Raang leiin biachimtu nih 'Russia cyber thlithup riantuannak hi US cozah hrihhram hninhseih duh ah a si. Kan cohlan lomi cawlcangh zong a si' tiah a chim.
Inn Raang le Treasury Department lei nih an chimmi cu thimnak ah thlithup riantuantu dan kan tat hna. GRU le FSB an si i, anmah hi sungthoh lei riantuannak ah aa telmi an si. GRU officer pali le GRU cawlcanghnak ah thlithup in a bawmtu company pathum a ti. Cun a dang tein US nih Evgeniy Mikhailovich Bogachev le Alexey Belan hi dan a tatmi an si. FBI nih caan sau pi chung an rak zoh cangmi hna a si.
Obama nih a chimmi cu 'Russian diplomats kan ram in kan tawl hna. A chungkhar he chuahnak caan 72 hrs kan pek hna. Private in a siah mipi theih in a siah ralrin kan pek lengmang cang hna. US harnak pek a timmi cu a herh ning le aa tlak ning in kan lehrul hna a hau' tiah President OBama nih a chim. Hi konghe pehtlai in fiang deuh in Trump nih sungthoh bu ka ton hna lai a ti.
Russia leiin an vun leh colh ve hna. US nih an tuah ning tein kan lehrul ve hna lai tiah Russian Foreign Minister Maris Zakharova nih a chim, asinain zeitin dah timi a chim lo. Putin biachimtu nih cun 'Presiddent Putin nih biachahnak a tuah rih lo' a ti. Ref: CNN.