US official upa le Palestinian official upa thlithup tonnak catlap lengah Egypt newspaper nih an phuan. UN nih Israel ralchanh in vote an tlakmi ah hin Obama le a cozah nih a thlithup in rian an rak tuan dih hnuah UN nih Israel ralchanh in vote a rak thlahnak a si tiah a vun lang than.
UN nih Israel ralchanh in vote an thlaknak ah hin Britain zong draft suaitu ah aa tel. Egypt Al-Youm Al- Sabea newspaper nih a tialmi cu 'Palestinian official upa Saeb Erekat sinah US State Secretary John Kerry nih a chimhmi cu UN ah Palestinian he riantuan ti ding in US timhnak kan ngei ko' tiah a chimh.
US official upa le Palestinian official upa tonnak ah aa tel chihmi hna cu US National Security Adviser Susan Rice le Palestinian Authority’s General Intelligence Service director Majed Faraj an si. Asinain Inn Raang pi National Security Council biachimtu Ned Price nih nithumni ah a chimmi cu 'cu bantuk tonnak a um lo. Egypt newspaper nih an chimmi hi 'ser chommi a si' tiah a phehpiak hna. President Obama le a cozah mualphonak hi a tlawm ti lo.
State Department nih a chim thanmi cu 'Palestinian official upa Erekat le John Kerry an i tong i, a dang tein Susan Rice cu an ton tiah a chim. Hmun khat tonnak cu an ngeih lo tiah a chimpiak ve hna. Nithumni ah Secretary of State JOhn Kerry nih Paris ah Israel le Palestinian kong phisinnak lam a chim lai. Asinain Israel nih kan i tel lai lo an ti.
Israel nih an tih ngai rihmi cu Kerry nih a suai i, Paris ah a chimmi hi UN ah an luh pi than sual lai ti hi a si. Israel zong nih fiang tein an theihmi cu UN ah Israel ralchanh in vote an rak thlakmi hi President Obama le a cozah khuakhannak lawng te a rak si timi kha a lang. Israel Prime Minister Netanyahu biachimtu David Keyes zong nih a chim.
President thimmi Donald Trump nih cun 'Israel, nan thazaang der hlah seh, January 20 ah President biakamnak ka tuah hlan chung te cu lung thawng in um ko rih u' tiah thazaang a pek hna. Ref: TOI.