Trump president a tlinhlah hrimhrim ah America ramchung ah Muslim a rak lutmi chek ning progran hi na hrawh a hau tiah Obama cu American Muslim nih an chimh lengmang i, a hrawh taktak cang.
September 11, 2001 ah Muslim ralhrang nih US inn sang pipi an rak pah hnu i US Homeland Security Program sermi cu President Obama nih nilini ah a hrawh cang. Cucu National Security Entry-Exit Registration Systems (NSEERS) program timi a si i, Muslim ram in a rak lutmi poah cu NSEERS program tangah tha tein an hlat dih hna i an chek dih hna.
Asinain 'a hlun cangmi National Security Entry-Exit Registration Systems (NSEERS) program cu The Department of Homeland Security (DHS) nih an hlawt cang lai tiah an biachimtu Neema Hakim nih a chim. Muslim ram in America ah a rak lutmi kan chek tawn ning hna program cu a luan cia kum ngan ah khan DHS nih a ngol cang' tiah a chim.
Muslim bu dirhmi The American-Arab Anti-Discrimination Committee (ADC) nih NSEERS program hi thleidan hmang program a si. Kutpinam zong a herh lo; an sining register tuah zong a hau lo' tiah an lungtlin lonak fak ngaiin an langhter. Obama cozah nih an hrawh thanmi hi a hmaanmi biachahnak a si an ti. US nih a ramchung security caah a tih ngaimi cu Muslim ram in a rak lutmi hna hi an si.
Septem 11 hnu hrimhrim cun Muslim ram in a rak lutmi poah cu NSEERS program zulhter dih hna an si. Cozah nih tha tein ahodah an si timi a theih hna i, a konglam record tling tein aa chiah hna. Asinain an chim thanmi cu 'kan hnangam tuk ding a si rih lo. Trump cozah nih kan thar chuah lai an ti caah kan hnangam tuk ding a si rih lo' tiah ADC director Abed Ayoud nih a chim.
Septem 11 hnuah Muslim ram in a rak lutmi poah kutpinamnak le register an tuahter ning bantukin Trump cozah zong nih tuah than ding in timhnak an ngei. Trump cozah nih thar chuah an timh caangka in Democrats le activist tbk hna nih Obama cozah cu biatak tein an forhfial hna. Hi bantuk thleidannak NSEERS phung le program hi kan hrawh awk hrimhrim a si an ti. Ref: NYP.