President Obama nih 2016 US thimnak ah Russia computer hack naak aa tel maw tel lo zoh dih ding in nawl a chuah cang tiah Inn Raang Homeland Security le Tapung Dohnak leiah tuanvo ngeitu Lisa Monaco nih ningani ah a chim.
2016 thimnak chungah zeidah a cangmi a si, Russia aa tel maw tel lo tha tein nan hlat dih lai tiah President Obama nih sungthoh bu cu nawl a pek cang hna. January 20, Inn Raang pi ah President thimmi Donald Trump a luh hlanah zoh thannak tuah ding in timh a si. Office in a chuah hlanah report a zoh ta lai' tiah a chim chih.
2016 thimnak ah hin Russia aa tel ko tiah an zumh. Thimnak result zong Russia nih an duh ning in a phi a chuah khawhnak hnga computer hack tbk in an rak tongh hna tiah zumh a si. Democractic Nationals Committee an hack mi te hna zong ah theih cio a si, asinain Russia nih cun kan si lo an ti.
Thim lai le thim chungah khan Clinton chairman sin in a siah democratic bu chung in a siah document an rak chuak sual lengmang. Mah nih cun democratic cawlcanghnak a thlak pinah a mualphoter lengmang. State level in a siah local level in a siah vote thlaknak system tiang in Russia nih rak tong hna seh law a dawh, asinain US sungthoh lei nih cun tehte an langhter kho lo.
Washington Post chim ning ah cun Republican senator John McCain le Lindsey Graham nih cun Russia an puh ko hna. Graham nih cun 'Russia hi vawleicung ah that lo leiin hmual a ser khotu bik pakhat a si. Kan ram thimnak zong ah aa thlak tiah ka zumh ko. A pumpak hrimhrim in Putin nih a tuar lai' a ti.
Russia aa tel maw tel lo timi zoh dihnak kan tuah dih cun fak ngaiin ruah a hau te ko lai tiah Monaco nih a chim. Ref: CNN.