Ningani President biakamnak ah Donald Trump nih Bible pahnih a hman hna lai. Pakhat cu a nu nih a hngakchiat lioah laksawng a rak pekmi a si lai i, pakhat cu US president minthang Abraham Lincol Bible a si lai. Vice President Mke Pence zong Ronald Reagan Bible an hman ve lai.
President biakamnak an tuah tikah an orhlei kut an tlir lai i, an kehlei kut in Bible an nam chih lai. Cuticun biakamnak an tuah lai. Donald Trump nih cun biakamnak tuah ni ah Bible pahnih ka hman lai tiah a chim. January 20 ah Bible an hman dingmi cu The Presidential Inauguration Committee (PIC) nih nihnihni ah an phuan cang.
Trum hi US President 45th nak a si lai. Abraham Lincoln Bible cu kum 156 leng a hlun cangmi a si. President biakamnak a rak tuah lai ah an cawkpiak i a biakamnak ah a rak hman. Library of Congress ah an fimpiak. Dawh tein an tamhpiak i, 1861 ah biakamnak an tuah lioah a hman. Cuticun hman loin a um lengmang i, President Obama nih 2009 le 2013 ah a rak hman.
Trump nih a hman chih than dingmi Bible cu a nu Mary Anne MacLeod Trump nih a rak thanhmi Bible a si lai. Children Day June 12, 1955 ah First Presbyterian Church in Sunday Church Primary School a rak awng i a nu nih laksawng ah a rak thanhmi a si.
CBN News ah Trump nih a chimmi cu 'a tha tukmi a si. Ka caah a tha khun, ka kau i ka rel lengmangmi a si' a ti. Campaign a tuah lio zong ah Bible hi ka tlaihchan cemmi cauk a si a ti. President biakamnak cu January 20, ningani ah United States of America Chief Justice John Roberts nih a tuah pi hna lai. Ref: TCP.