Zarhpini ah President Trump nih Canada le Mexico he chawhlehthalnak hnatlaknak North American Free Trade Agreement (NAFTA) an tuahmi cu a thar in kan i ceih than lai tiah a ti. Canada le Mexico hruaitu he tonnak an ngeih tikah an i ceih te lai, January 31 ah voikhat tonnak a um lai.
Canadian Prime Minister Justin Trudeau le Mexican President Enrique Peña Nieto he ton ding in timhnak ka ser cang tiah President Trump nih a chim. Inn Raang leiin an chimmi cu January 31 ah Trump le Nieto an i ton lai a ti.
Kum 23 chung kaar an hlan pi cangmi a si ko nain Trump nih a rak uar lem lo. America nih kan ceih pi than hna lo ahcun kan miaknak a tlawm tuk a rak ti. Campaign a tuah lioah NAFTA hi a thar in kan ceih than a hau lai a rak timi a si. President biakamnak a tuah a ni thumnak ah aa timhnak a vun phuan colh.
Campaign a tuah lioah a rak chimmi cu 'NAFTA kong a siah mipem kong a siah kan ramri kong a siah a thar in kan ceih than dih lai' a rak ti. Asinain Trump nih aa harh ngai te lai tiah an zumh. Republican upa lei zong in Trump khuakhan hi an uar lem lo. Free Trade hi an rak duh cio, cucaah Trump nih Canada le Mexico hi a tei kho te hna hnga maw tiah an lunghring.
Mexico he zong in aa khawngdeng len te lai. Vampang saknak caah Mexico nih tangka an liam chung lai a timi zong Mexico leiin an hnatlak pi lo. Cun company pawl nih ramdang in US ah thil an rak phur i, an rak zuar tikah ramri tax fee liamter an si lai a ti. NAFTA phung a buar colh ding a si. Cucaah President Trump nih zei tiang dah a kal pi khawh te lai. Ref: CNN.