Iran khuapi Teran ah Inn dot hleisarih a cim. Mei thattu telh in minung 75 an thi. Mei thattu cu mei an thahnak ah a thimi an si. Minung tam ngai sizung an phan. A cimmi inn hi a phunphun in thil an zuarnak inn a si. A chungah minung tam pi an um rih lai tiah zumh a si.
Inn a cimhnak hi Britist embassy pawngah a si. Iran khuapi Teran ah a tar ngai cangmi inn a si. Chawlehthalnak hmun le hma caah hmanmi a si tiah State TV nih a chim. Kum 50 hrawng a hlun cangmi a si. A hlun ngai cangmi a si tikah a chungah mei lei kongah ralrinnak thilri zong a um ti lo.
Inn lei tuanvo ngeitu sin zong ah atu le atu in ralrinnak kan chim lengmang cangmi a si. Meithahnak thilri a um lo pinah security caah tihnung a si cang tiah kan chim lengmang cang tiah meithahnak lei i tuanvo ngeitu upa Jalal Malekias nih a chim. Hleidonh cung i vampang tbk kip zong ah thilpuan an tlaimi an tam tuk a ti.
Cu bantuk cu a tihnung tukmi a si. Ralrinnak kan chim lengmang ko nain inn lei tuanvo ngeitu manager pa nih zeihmanh a kan relpiak lo tiah a chim chih. Hi dot 17 hi 1960 hrawngah Irannian Jewish business Habib Elghanian nih a rak sakmi a si.
Plastic Sernak Company caah a rak sakmi a si. A rak sak lioah cun Teran khuachung ah a sang bik a rak si. Islamic Revolution nih 1979 ah uknak cozah an rak lak i, Elghanian cu sungthoh lei riantuan na si tiah sual an phawt i an rak thah. Jews miphun zong tam tuk an rak zam hna. Inn a kangh i, a cimhnak ruang an hlat cuahmah lio a si. Ref: CNN.