President Trump nih Muslim ram paruk chung in refugee luhter rih hna lo ding tiah President Nawlngeihnak min a thut hlanah Iraq minung pahnih cu ningani ah US visa in New York an rak tlawng. Asinain Trump nih a kham hnu a si tikah an tlaih hna.
Iraq minung pahnih sihni nih an chimmi cu US an rat hi phungning tein a si ko. An visa zong a nungmi (valid) visa a si ko a ti. An min cu Hameed Khalid Darweesh le Haider Sameer Abdulkaleq Alshawi an si i, minung pakhat cu Trump president biakamnak a tuah thaizing ah visa a hmumi a si.
Iraq ah US cozah he kum hra chung rian a tuan cangmi zong a si. Alshawi zong hi January thla thok ka hrawngah visa pek cangmi a si ve. A nupi le a fapa hi US ah a ummi an si i, anmah ton awk ah a rami a si. Anmah zong US ralkap he aa pehtlaimi an si tiah US ah refugee status pekmi an si.
Biaceihnak zung lei nih an chimmi cu Customs and Border Protection nih an sihni le minung pahnih zong tonter an duh rih hna lo. President Trump tu ton ding in an fial hna a ti. Iraq minung pahnih nan hrenmi hna hi a hmaan lomi a si. President Trump nih January 27, 2017 minthutnak a tuahmi zulh in nan tlaihmi hna a si. Cucaah phungning a si lo an ti.
An chim thanmi cu an visa ngeihmi hi phungning tein pekmi an si. John F. Kennedy International Airport ah an rak phak in an hren hna. Department of Homeland Security officials zong nih an chimmi cu vanlawng cungah a um i, a rak phan dingmi zong kan hren hna lai i, an ram ah kan khirh than ko hna lai an ti. Minung zeizat dah an hren cang hna timi fiang in theih a si rih lo.
President Trump nih min a thutmi cu 'Syrian refugees luhter rih hna lo ding; refugee dangdang zong US ramchung luhter tuk rih hna lo ding. Tha tein hlathlai hmasa dih hna hnuah luhter te hna ding. Iraq ram telh chih in Muslim ram ruk zong ni 90 chung US luhter rih hna lo ding. A dangdang zong Trump's Cabinet team nih tha tein zoh hmasa rih ding a si lai. Ref: CNN.