Katie Rich hi ahodah a si, Baron Trump kongah zeitin dah a tial, Saturday Night Live in zeiruangah dah capo seihthiam an bar diam? Ngaihthiam awk a tha lo! Naite ah ngaihthiam awk a tha lomi PresidentTrump fapa Baron Trump kong a twitter ah a tial i, twitter hmangtu hna cu a puak in an puak.
Twitter ah a tialmi cu President Trump fapa Baron Trump hi 'a sianginn ah mi kap hmasatu a si te lai' tiah a tial. Twitter hmangtu kip nih an vun phomh len. A hnuah a twitter zong a delect i, a twitter account zong a khar colh. Asinain a hnuah ngaihthiamnak a vun hal than hna. A tialmi cu:
'Khuaruat lo tuk in ka tweet mi kongah zaangfahnak tein ngaihthiam kan hal ko hna. Ka tuahsernak le bia tha lo ka hmanmi cungah kaa ngaichih tuk. Ngaihthiam awk tha ka si lo. Ka palh tuk hringhran' tiah mipi sinah a vun tial than. President Trump biakamnak a tuah hnuah a tialmi a si.
Saturday Night Live a thlahtu NBC nih Katie Rich cu an rian in an dinhter colh. Caposeihnak puai (Comedy Show) a si i, an uar ngaingai program pakhat a si. President Trump kong zong an cawn i, midangdang kong zong an cawn hna i, capo an i seihnak hmun a si. Zan tlai hnu ah an tuahmi zong a si i, Katie zong a tuan ve, asinain an dinhter cang.
Katie Rich hi catial thiam zong a si i, caposeih thiam zong a si. Chicago i Orland ah a ummi a si i, Northwestern University ah degree a lami a si. December 2013 ah Saturday Night Live ah a rak tuan cang. Ice Harvest le Bad Johnson film tbk zong ah a lang tawn. Ref: The sun.