Kan vampang saknak caah Mexico ka liamter hna lai tiah President thimmi Donald Trump nih a chimmi cu 'bator vampang caah Mexico nih tangka kan liam naisai lai lo' tiah Mexico President thing Vicente Fox a vun ti ve. Vampang sak a timhmi hi 'miphun thleidan' a si tiah fak taktak in a vun tongh.
Trump nih vampang kong hi biapi ngai in a chim lengmangmi a si. Campaign a tuah lioah a chim tawnmi cu Mexico ka liamter hna a ti. A hnuah a chim thanmi cu vampang kan sak khawhnak ding ah cun a tha bik in rian kan tuan a hau tiah Trump nih a chim.
Vicente Fox nih a twitter ah a tialmi cu 'Trump vampang saknak caah a duhmi paoh a hal ko hna lai, asinain keimah ka siah Mexico kan siah miphun thleidanak a ngeimi caah kan liam naisai lai lo. A biakam a tling kho hrimhrim lai lo' a ti. A hnuah a tial thanmi cu 'Trump, na bator vampang caah tangka kan liam naisai lai lo timi thei. US tax a pemi nih an liam lai' a ti.
President thimmi Donald Trump nih a tweet vemi cu 'rianrang in kan sak khawhnak ding ah US nih kan pek ko lai i, a hnuah Mexico nih an pek te ko lai. A dingfel lomi Media nih report hmaan lo an pek caah a si' a ti.
Fox nih fak ngaiin a tial thanmi cu 'Trump, sungthoh bu nih an report mi cu aa dawhcah lo taktak. Thimnak hi 3 million vote na sung. Phungning tein president na si taktak maw?' tiah fak ngaiin biahalnak a tuah. 'Vampang saknak zong kan pek lai lo' tiah thinhung ngaiin Trump cu a phomh. Ref: The sun.