Naite ah ISIS he aa pehtlai timi pa nih motor in Israel ralkap pali thi lak in a pah hna i, 16 a hliamh hna. Israel hloh ding le hrawh ding in ral a thomi Hamas tapung nih an lunglawmhnak le an thangthatnak an rak langhter colh. Motor pahnak a um hnu in Israel ralkap nih minung pakua an tlaih cang hna.
Zarhpini zanlei in nikhatni zing tiang Hamas tapung he aa pehlaimi umnak an kulh hna i, West Bank ah minung panga an tlaih hna. West Bank i Jenin ah pathum an tlaih hna i, minung pahnih cu Jerusalem in nichuah leikam Al-aroub ah an va tlaih hna. Motor in Israel ralkap a pah tu pa cu an kah colh i, an thah colh. Kum 28 a si.
Israel ralkap lei upa nih cun ISIS he aa pehtlaimi a si lai tiah an zumh. Asinain ahohmanh nih kan minung a si tiah an phuang lo. Hamas raltho tapung tu nih cun mi raltha a si tiah an rak thangthat colh. Fadi al-Qunbar bantukin Israel hi kan doh cio hna ding a si tiah an au len.
Palestinian media tialning ahcun Qunbar hi Popular Front for the Liberation of Palestinian (PFLP) he aa pehtlaimi a si an ti. Motor in a pah hna hnuah Israel ralkap upa nih nawl an chuah colhmi cu Qundar he aa pehtlaimi le a thangthatmi paoh cu tlai colh hna u an ti. Atu tiang ah minung pakua an tlaih cang hna. Minung panga hi Hamas tapung he aa tlaimi an si.
Minung pali tu cu lunghrinh deuhmi an si. Police zong nih hmun khat hnu hmun khat in an kawl i an hlat cuahmah lio hna a si. An tlaihmi hna sinin meithal zong an tlaih hna. Ref: TOI.