Washington DC ah President Trump mipi an tho ve cang. 'March For Life' timi "Nunnak Caah Lamzawhnak" timi mipi lamzawhnak an ngei ve. Nauhrawh zalonnak (Abortion) a dohtu poah an chuak hna. Vice President Mike Pence nih biachimnak zong a ngeihpiak hna.
'Nunnak nih a tei cang' tiah ningani ah mipi sinah a chim. President Obama chan ahcun nu nih an duh ning paoh in abortion tuahnak nawl an ngei. US Federal cozah tiang nih US lawng hmanh si loin vawleicung nauhrawhnak ca tiang ah tangka a bawmh hna. Nauhrawh zalonnak policy thawng tuk in an hman.
Asinain President Trump nih cun 'US Federal cozah nih nauhrawhnak caah tangka a hmanmi vialte kha a president nawlngeihnak in a kham cang. US tangka hi Nauhrawhnak fun ah kan hmang ti lai lo a ti. Cucaah Mr. Pence nih mipi sinah a chimmi cu 'nunnak nih a tei cang' a ti. Obama chan ahcun thihnak nih a tei i, atu cu nunnak nih a tei cang.
Naurhawh zalonnak phung a duh lomi paoh ningani ah lamzawhnak an vun ngeih hi uar an um tuk. President Trump le Republican hruaimi Congress hna ca zong ah thazaang taktak a vun si lai. Vice President Pence nih mipi hmaiah bia a chim hlanah Presidnet Trump nih thazaang a vun pek ve hna. 'Kan dirkamh hna' tiah twitter in a tial ve.
President biakamnak (January 22, 2017) a thaizing nirukni ah khan million in nu lamzawhnak a rak um. An au pimi cu nuco, nauhrawh zalonnak le a dangdang an au pi. Cheukhat nih cun 'Satan liberal nu pawl' an ti hna.
Asinain tu chun ningani i lam a zawhmi hna cu nunnak caah lamzawhnak a si cang. 1973 i US Supreme Court hruaitu Roe V. Wade nih nauhrawh zalonnak phung a rak sermi doh awk ah a rak chuakmi an si. Hi phung hi an thlen than men te lai tiah zumh a si. President Trump nih Suprem Court biaceihtu a thim dingmi hi conservative Khrihfa nauhrawh a duh lomi a si lai tiah an zumh. Ref: VOA News.