Ningaini in cun President thimmi Donald Trump cu Inn Raang ah a lut cang lai i, President Obama cu a chuak ve cang lai. US democracy upattlak a sinak cu atu bantuk nih a langhtermi hi a si. Thluang tein hruaitu thlennak le rianchanhnak an tuah kho lengmang.
Asinain an tuan chungah mipi nih zeitin dah an hmuh hna timi hi a biapi ngai. CNN nih ruahnak laknak poll an tuah. President a tuan chungah a hlawhtling maw tiah mipi ruahnak an hal hna. 60% nih a hlawh tling tuk an si. President a tuan chungah tutan hi tam cem nih a hlawhtling tiah poll ah an ruahnak langhter.
Bill Clinton (2001) kha aa dinh lai ah 66% ni a hlawhtling an ti; Ronald Reagan (1989) kha 64% nih a hlawhtling an ti. President Obama zong cheuthum-cheuhnih nih President a tuanmi hlawh a tling ko an ti. 25% nih President Obama hi US President tuanbia vialte lakah a hlawhtling bikmi pakhat a si an ti.
23% nih cun a hlawhtling lo cem president a si an ti. President thing George W. Bush kha cu 46% nih a hlawhtling lo cem tiah an rak ti. Democrats leiin 54% nih US President vialte lakah a hlawhtling cem pakhat ah aa tel an ti lioah Republican leiin 54% nih cun a hlawhtling lo cem President a si an ti ve.
President Obama nih Office a tlaih ah hin US ramchung sipuazi a tlak tuk lio zong a si i, ramdang zong ah an min a chiat tuk lio a si. President a tlin ah hin 72% nih an ruahmi cu miphun thleidannak a damter lai an ti. Obama min a thatnak zawn cu education, gay le lesbians, environment le climate change policy a sermi kong hna ah hin an si.
Meithal policy kong tu ah cun an soisel ngai. A riantuan chungah meithal kahnak a tam ngai. Mipem, healthcare, tapung le cybersecurity kong zong ah mipi lungthin tuai ngaiin a chiah tak hna lai. Asinain a buaktlak in a riantuannak an zoh tikah a hlawhtling bikmi US President tuanbia aa telmi pakhat ah 60% nih cun an ruah. Ref: CNN.