Barna Trends 2017 report nih a chimmi cu American 65% nih thihumnak tuah hlanah ngaknu le tlangval um ti hi a tha deuh an ti; 35% nih cun a tha lo an ti ve. 57% nih an chim thanmi cu kan ngaknu he kan um ti ko; kan tlangval he kan um ti ko; kan tluang ngai ko an ti ve.
Thitumnak tuah hlanah hmun khat um ti a thatnak ruang an chimmi cu tangka zong kan khawng deuh i, kan i nuam deuh i, thitumnak kan tuah tik zong zong ah harnak a um ti lo an ti. Kan um ti chungmi nih nu le va dirhmun phaknak ding caah lam zong a kan sialpiak i, hmailei ah kan um ti kho taktak lai maw ti a kan hngalhtertu zong a si tiah 84% nih an chim.
62% nih cun kan um ti chung ruangah zeihmanh aa dang deuhmi a um hlei lo an ti. 18% nih cun thitum hlanah um ti cu thilphurh lam a rihter an ti. Report nih a chim thanmi cu nu tampi nih Khrihfabu an chuah tak cang a ti. A ruang hna cu nun cawmnak caah a herhmi a tam tuk cang. Chungkhar muisam le herh ning zong aa thleng cang. Pumpak in dirkamhnak kawl zong a hau cang an ti.
Hnulei tuanbia zoh tikah pa tu hi biakinn ah kal a duh lo deuhmi an si. 'Nihin Khrihfabu caah tuanvo lianpi a ummi cu nu hna thazaang pek hi a si' tiah report nih a tial. Research nih a chim thanmi cu biakinn ah a kal bal lomi cu mah tein thah a tam i, biakinn ah a kal lengmang nak in a kal bal lomi hi an him lo deuh a ti.
Harvard School of Public Health leiin professor pakhat nih a research mi ahcun 'biakinn ah a kal lengmangmi nu-va cu caan sau pi an um ti kho i, lungretheih le harnak dangdang nih harnak a pe tuk hna lo. Aa thenmi zong an um tuk lo' tiah a chim. Biakinn a kal bal lomi cu chungkhar in a siah pumpak nunnak ah a siah then le lungdonghnak hi a tam ngaingai tiah a chim chih.
Barna report nih a biapi ngaiin a chim thanmi cu Khrihfabu caah kan ral taktak a simi hi a piaka film a si a ti. Phone chan a si tikah internet a um paoh ahcun zoh khawh peng a si i, Khrihfabu caah zuamcawhtu taktak a si. Ni fatin in zohmi le hmuhmi a si tikah duhsah tete in nunphung le zatlangnun ah a lut chin lengmang cang i, nunnak he aa tlai cang a ti. Ref: TCP.