America President tuanbia vialte lakah President thimmi Donald Trump cozah thlennak (transition) tuanbia a chia bik tiah Gallup Poll nih a phuan. Inn Raang a luhnak ding ah timhtuahnak a ngeihmi/ning vialte mipi nih zeitin dah an hmuh cio timi mipi ruahnak an lakmi a si.
President biakamnak cu January 20 ah a tuah cang lai. Zarh khat lawng a tang cang. Cozah hruai ding in zeitluk tha in dah Trump nih timhtuahnak a ngeih timi le cozah thlennak ding ah a zulhmi lam zei tiang dah a that timi American mipi ruahnak (Poll) an lakmi ah 44% nih a tha ko an ti. 51% nih cun a tha lo an ti.
President Obama kha cu 83% nih a tha an rak ti i, 12% lawng nih a tha lo an rak ti. Obama nih Inn Raang luh lai i timhnak a ngeihmi le a kal pimi lam a tha tuk an rak ti i, an uar tuk. George W. Bush kha 61% nih a tha an rak ti i, Bill Clinton kha cu 68% nih a tha an rak ti. Trump he kan thahchun hna ahcun Trump sinah cun an rak sang ngaingai.
Trump teinak hi Russian kong nih a zelh tuk tikah mipi lungthin zong vaivuan in a um dih. Trump teinak hi Russia ruangah a si maw timi mipi ruahnak zong Quinnipiac Poll nih an lak ve i, American mipi tam deuh 55% nih Russia ruangah a si ko an ti lioah 36% nih a si lo an ti. Ref: NYP.