Nithumni ah President thimmi Donald Trump nih a voikhatnak press news conference a tuah pi hna. US thimnak kongah Russian an i thlak ko timi a zumh cang. A biapi ngaiin a campaing ah chim tawnmi thil pathum zong ka tuah colh hna lai tiah a phuan than.
A pakhatnak ah Obamacare hi kan thlen lai; a pahnihnak ah vampang ka chon colh lai i, a pathumnak ahcun Supreme Court Biaceih thar ka chiah lai a ti.
Russia kongah a chimmi cu 'US thimnak hi Russia nih a kan hack ko tiah ka zumh' a ti. 'Putin nih a tuah awk a si lo. A tuah awk hrimhrim a si lo. Midang nih kan ram an hruai lioah si loin keimah nih ka hruai chungah cun Russia nih kan ram hi an upat hrimhrim lai' tiah a chim.
'Putin he kan kal ti kho lai maw timi ka thei lo. Kan kal ti kho lai ti ka zumh lo tiah Trump nih a chim than. Tuan deuh ah khan cun Russia he rian kan tuan ti lai i, vawleicung daihnak le thatnak caah rian kan tuan ti lai a ti. Trump nih mipi sinah biahal bantukin a chimmi cu 'Putin cungah hin keimah naak in Clinton hi a hrang deuh lai ti hi nan zumh taktak ko maw' tiah a hal hna.
Trump nih a chim thanmi cu Russia lawng hi US a kan hack tu an si lo a ti. Democrats zong nan daithlang tuk tiah a mawhchiat hna.
Obamacare kong cu biatak ngaiin a chim. Kan kirh than lai i kan thlen lai. Zarh khat maw kan rauh lai, ni khat maw kan rauh lai, suimilam caan chung maw kan rauh lai' tiah a chim. Kan ramri zong vampang kan kham lai. Mexico nih tangka an pek lai i, Congress nih a hnuah kan liamh than te hna lai a ti. Kum khat zong kan hngak lai lo; kum cheu zong kan hngak lai lo a ti.
US Supreme Court caah minung 20 ka tar cangmi hna chungin minung pakhat ka thim lai i, Antonin Scalia hi ka thlen lai. January 20 in a zarh hnihnak ah thawng kan thanh te lai' tiah President thimmi Donald Trump nih a chim. Ref: CNN.