Zarhpini zingka te ah US Special Ralkap nih Al-Qaeda tapung cu Yemen ah an va phomh hna. US ah Muslim luhter ti lo ding in President Trump nih min a thut, nihnih hnuah a voikhatnak tapung a phomhnak a si. US rakchung luhter lo ding in Yemen hi Trump nih min a thutmi ah aa telmi a si.
Al-Qaeda tapung an phomhnak ah US ralkap pathum an i hliam i, pakhat a thi. Tapung 14 an thi i, mi pi leiin nu 8 le hngakchia 8 an thi. US ralkap lei nih an chimmi cu Al-Qaeda tapung 14 an thi tiah a chim nain Yemen local report ah cun minung 41 an thi tiah a tial ve. Tapung lei information zong an lakpiak chih hna tiah ralkap lei nih an chim.
An lakmi information nih thathnemnak tampi a kan ngeih lai tiah an zumh. Hmailei tapung riantuan timhnak vialte kan theih cang lai an ti. An va kahnak hna hi Baida peng i Yakla ah a si. US ralkap nih fiang tein an hlat dih hnu le an theih dih hna hnuah an va phomhmi hna a si. Al-Qaeda he aa pehtlaimi khuabawi pathum zong an va phomh chih.
An helicopter nih sianginn zong a kah, Muslim biakinn zong a kah cun tapung nih an hmanmi sizung zong an kah chih. Khuami chungah an thah chihmi hna cu Abdulraouf, Sultan al-Zahab le Saif Alawai al-Jawfi an si. Al-Qaeda he aa pehtlai ngaimi an si tiah theih an si. US sungthoh bu nih an chim lengmangmi cu 'Yemen hmunkhur Al-Qaeda tapung hi a tihnung taktakmi an si an ti.
President thing Obama zong nih a kum a dongh lei ah khan cun drone in a phomh lengmang cang hna. President Trump zong a biakam ning in rian a tuan ahcun ram kip ah tapung a phomh lengmang ko lai tiah zumh a si. January 14 ah US ralkap upa nih an chimmi cu tu zing (zarhpini) an kahnak hmun i Al-Qaeda hruaitu pakhat kan rak thah cang an ti. Tu zing zong ah an hruaitu pakhat an thah than. Ref: The sun.
President Trump Nih Pathum Chungah Pakhat A Thim Cang Lai
------------------------------