21st-Century Panglong Conference cu February 28 ah a si cang lai. A nai ngai cang, asinain timhtuahnak ngei ding le mipi ruahnak hal ding in Chin State ahcun National-Level Political Dialogue tuahter an sianh hna lo. Chin National Democractic Party (CNDP) nih cun an lungtlin lonak biatung an chuah cang.
Chin National Front (CNF) lei upa zong an lungrawk ko. Boycot ding in kan ruah cuahmah lio a si tiah Dr. Lian Hmung Sakhong nih cun a chim. Arakan Liberation Party (ALP) lei zong nan tuah kho lai lo an ti ve hna. Party upa leiin Daw Saw Mra Yazar Lin nih cun 'Union Political Dialogue Joint Committee (UPDJC) thil tuah hi biahal awktlak in aa tuah' a ti ve.
CNF Senior Official upa pakhat a simi Dr. Sui Khar zong nih UPDJC thil tuah hi 'thencheunak khuakhan' a si a ti ve. A chim thanmi cu 'National-level political dialogue caah timhnak kan ngei peng cang. Cozah lei nih 'dialogue' nan ngei kho lai lo a kan ti, asinain daihnak minthumi dangdang cu an i tel ko hna. An thil tuah hi biahal awktlak an si' a ti.
'Chin State hmun zeimaw i zung kan dirh ah hin local community cheukhat nih an duh lonak an rak langhter i, cucu cozah lei nih a ruang lak in 'dialogue' tuahter a kan sianh lonak a si. Cozah official nih an chim thanmi cu 'Chin State hi Thlang le Chak in nan i then' a kan ti tiah a chim chih. Cucaah 'dialgoue' an tuah ahcun buainak a chuak sual lai ti an phanpiak hna caah zong ah a si kho men.
Chin State, Paletwa khua ah hmun a khurmi Arakanese Armed Groups hna ruang zong ah a si lai tiah zumh an si. December 2016 ah khan Kawl ralkap he an rak i kap i, khuami zong an rak zam len hna. Hi hna hi Chin State caah dawnkhantu ngai an si. January 28 ah Dr. Lian Hmung Sakhong nih 'Chin State ah cawlcangh nan hrial lai' tiah a chimh cang hna.
Arakan Army lei biachimtu nih cun CNF leiin zeihmanh official tein nan ralkap la cang hna u timi kan thei lo. Kan ralkap tu cu Chin State in Thlanglei kam ah an um ko tiah Khine Thu Hka nih The Myanmar Times ah a chim chih. Arakan Army (AA) hi NCA ah minthumi an si lo nain the Northern Alliance-Burma ah chungtel an si. Cu hna cu Kachin Independence Army (KIA), Ta’ang National Liberation Army, Myanmar National Democratic Alliance Army (MNDAA) le Arakan Army (AA) an si.Ref: TMT.
CNF Upa Chunmang Vialte A Pakpalawng Can Dawh A Si Cang
---------------------------------