Nikhatni ah US, Missouri ah Jewish thlaan 170 hrawng an hrawhpiak hna. Jewish center hmun 11 hrawngah bompuah ding in hrocernak a um than. FBI le US Justice Dapartment bawmh in hlathlainak an tuah cuahmah lio a si. Kum thar hnu in Jew miphun dohnak le huatnak a linsa chin lengmang.
New York, New Jersey, Ohio, Florida, Massachusetts, Maryland, Michigan, Minnesota, Delaware, Connecticut, Alabama, California, Maine, Tennessee, South Carolina, Missouri, Wisconsin, Texas le Kansas tbk hna ah hin an zual khun.
Bompuah ding in thihpheihnak an tuahmi cu an hlat tikah a hmaan lomi an si. Inn Raang leiin Press Secretary Sean Spicer nih 'hi bantuk cu kan cohlang kho lai lo tiah President Trump nih fiang tuk in a chim cangmi a si. Pumpak zalonnak zoh chih in kan dirhmi ram ah hi bantuk huatnak le sualnak cu hmun a ngei lomi a si' a ti.
American-Muslim nih bawmh ding in tangka an kawlpiak cuahmah lio hna a si. $20,000 hmuh ding in timhnak an ngeihmi cu $55,000 leng an hmuhpiak cang hna. Thlaan remhnakk ding ah 20,000 kan pek hna lai i, a hleimi cu hmun kip Jewish center bawmhnak ah kan pek hna lai tiah Islamic Society of North America (ISNA) President Azhar Azeez nih a chim.
A chim thanmi cu 'an thlan ser thannak ding ah bawmhnak pek cio ding in kan community kip kan chimh hna. Kan dirkamhnak hna kan langhter hna lai; hi bantuk huatnak hi Jew miphun le Muslim community karlak ah a um awk hrimhrim a si lo. Cucaah nan ti khawh tawk cio in bawmhchanhnak chuah cio u tiah an Muslim community cu kan forhfial hna' a ti.
Missouri Gov. Eric Greitens nih 'ni bantuk tuahsernak hi nautat awktlak thil a si. Hi bantukin then-cheunak a kawlmi hna cu a kan then-cheu kho naisai lai lo. Thawng chin lengmang tu in a kan fonhtu lehlam a si lai' a ti. Ref: BBC & TNYP.
Zarh Khat Ah £1Million In Taluk Ah Aa Thial Men Lai
---------------------
--------------------------