Biahaltu: Ka riantuannak ah minung pakhat a um i, Khrihfa ka si aa ti i, a Khrihfabu kong zong a ka chimh len ko nain mi thangchiat le congawih a hman ning hi ka khuaruah a har. Zeitin dah Khrihfa ka si aa ti ko buin thangchiat le congawih a hman. Cu bantuk cu Khrihfa a si kan ti kho lai maw?
Rev. Billy Graham: Pathian lawng nih, cu nu lungthin cu a theih i, Jesuh Khrih a zum taktakmi a si le si lo zong a theih lai. Pathian lawnglawng nih a kong a ceih khawh. Bible nih a hmaan lomi zumhnak kongah ralrinnak a kan pekmi a um: Zumtu an i ti ko nain zumtu taktak a si lomi an um. Cu bantuk minung hna cu James nih a kan chimhmi kha a si: 'Cu bantuk cu ruahnak phir pahnih a ngeimi an si i, an tuahmi kip ah a fekfuan lomi an si' a ti (Jem 1:8).
Bible nih fiang tein mi thangchiat le congawih cu a hmaan lo tiah a kan chimh. Zumtu hmaan taktak nunnak ahcun cu bantuk ziaza cu a um awk hrimhrim ding a si lo. Congawih le thangchiat nih aa tinhmi zeitik hmanh ah a hmaan bal lo. Midang thazaang peknak caah congawih le thangchiat timi a um bal lo; thlak duhnak ruang in tuahmi an si. Congawih le thangchiat nih minung nunnak zeizat ko dah a hrawh cang? Bible nih fiang tein a kan chimhmi cu 'thing lo cun mei a mit ko; congawih le thangciatnak lo cun rem lonak zong a thi ko' a kan ti (Phung. 26: 20).
Pathian mithmuh zong ah a hmaan lomi a si zeicatiah congawih le thangchiatnak nih charhchan a hmanmi cu lih le hrokhrol kha an si. A hmaanmi hmanh kha charhchan ah hmang seh law a hmaanmi charhchannak kha congawih le thangchiatnak thlapahle nih a khuh thiamthiam lai. Bible nih 'aa dawhcah lomi bia kha nan ka chungin chuahter hlah u, asinain midang dirkamhnak le thazaang peknak bia tu hna kha chim hna u' a kan ti (Efesa 4:29).
Kha nu i a ziaza dawhcah lomi nih khan Jesuh Khrih he an hlatter hrimhrim hlah seh. Amah tu cu Jesuh Khrih lei tu ah na lungthin le na nunnak kau piin awng chin lengmang ko. Pathian nih timhnak ngei in an ser hnawhchanmi minung na si khawhnak hnga an sersiam lengmang ko seh. Kha nu ca zong ah thlacamnak in bawm lengmang law Jesuh Khrih a herhnak a theih i, a nun aa remh khawhnak hna chimh khawh i zuam lengmang. Pathian nih a tehte tha ah an hmang ko seh!
Zeiruangah Dah Cheukhat An Rum I, Cheukhat An Sifah?: Billy Graham Bialehnak
--------------------------------