President Trump nih Muslim ram pasarih cu US lut kho lo ding in ni 90 chung a kham. Ramchung he ramleng he buainak a ser ngai caah Washington in Federal Biaceihtu nih caan karlak chung President nawlchuah cu an vun phihpiak than. Federal Appeals Court ah Justice Dapartment nih ca an tial than ve.
President Trump nih Muslim khamnak nawl a chuahmi hi a rannak in nunter than u tiah an nawl hna. Asinain San Francisco i The 9th U.S. Circuit Court of Appeals nih zarhpini zing ah an lehmi hna cu nikhatni zanlei ah nan dirpimi biatung hi tam deuh in rak tial than u tiah an chimh hna. An chimh hna ning tein an tuah than i, nihnihni ah kap hnih in biaalnak (debate) an ngei lai.
Justice Dapartment nih an dirpimi cu Muslim khamnak hi phungning a si ko. US ah a hodah a lut kho i, ahodah a lut kho lo timi cu President nawlngeihnak tangah a ummi a si. Federal Biaceihtu nih President Muslim khamnak an phihpiak thanmi cu an palh pinah karhlei an laam tuk' an ti.
Acting Solicitor General Noel Francisco nih cun nirukni zan ah thawng taktak in a chimmi cu 'US ah a hodah a lut kho i, ahodah a lut kho lai lo timi kongah cun President nawlchuahmi hi biaceihtu nih cun doh khawh a si lo' tiah a chim. Analyst pakhat New York-based attorney Dan McLaughlin nih a chim vemi cu 'US Supreme Court tiang hna an phak ahcun Trump nih a tei te ko lai' a ti ve.
'Caan sau pi chungah Supreme Court nih a zulhmi cu Congress nawlngeihnak hi a si. Ramchung luh khawhnak le luh khawh lonak nawlngeihnak cu Congress cungah a um. President nawlngeihnak cu Congress nih a pek chinmi a si caah mipem kongah cun President nih nawl a ngei ko. A policy a that le thatlo nih lai a rel ti lo. Nawlngeihnak pek a simi nih lai a rel cang tiah fiang ko in a chim. Ref: VOA News.
President Trump Nih Thlarau Le Chawva Sullam Aa Fiang Cang
---------------------------------