Europe in nichuah lei kam cu NATO ralkap lawng te an si. Ni fatin NATO nih an ralkap eksaisai an tuahter peng hna. Russia he ramri an i hrawmnak hrawng an si tikah kap hnih in ahodah buainak a ser hmasa lai timi lawng an i bawh ko cang. NATO nih ramri a kan det tiah Russia nih an puh lio hna ah NATO zong nih an puh ve hna.
President Putin nih a ramchung ralkap cikhat te a va leng hna. Raltuknak vanlawng an siah a ralkap an siah zeitik caan paoh ah timh cia in nan um lai tiah ralrinnak a pek hna. Europe in nichuah lei hrawng cu thinphan dai loin an um peng hna. Russia nih Kaliningrad ah hin a nuclear hriamnam tiang in a chiah cang. Hi ram hi NATO ram Poland, Belarus le Lithuania tbk hna he ramri aa hrawmmi an si. Russia hriamnam kongah NATO zong thinphan dai loin an um.
Russia nih Ukraine in Crimea a lak cang bantukin Europe ram dangdang a lak than sual hna lai ti an phang ngai. Naite ah US nih a ralkap 3000 in 4000 karlak hrawng Poland ah a thlah. NATO caah thinphan dai lo a simi cu President Trump cozah nih NATO hi a dirkamh ti lai maw ti peng a si. Trump nih cun NATO ram pawl cungah a lungtling lo. NATO caah tangka an pekmi a tlawm tuk a ti.
Man loin US vanlawng aa citmi bantuk lawng te an si a ti. British PM May zong nih Trump lungtonnak ding ahcun tangka thazaang kan i sengsen deuh a hau ko cang a ti ve. Asinain US Defence Secretary James Mattis le German Defence Minister Ursula von der Leyen phone an i chawn i, NATO kan dirpi peng ko tiah a chimh. Mattis hi NATO hruaitu upa thing a si bantukin NATO cungah zawnruahnak a ngei peng. NATO caah hnangam ngai a vun si. Ref: The sun.
Latvia Ram In Ralpi Pathumnak Aaa Thok Lai: US Ralkap Lei Expert
---------------------------------