Zarhpini ah President Trump cu Fox News nih biahalnak an tuah i Iran kongah fak ngaiin a chim. Trump nih fiang ngaiin a chimmi cu 'Iran nuclear kongah US hruainak in P5+1 nih hnatlaknak an tuah pi hna hnu cun Iran nih US a upatnak a zor i, a ral zong a tha chin lengmang cang' a ti.
'Iran nih US cungah upatnak a ngei ti lo zeicatiah kha bantukin hnatlaknak tuah pi ding kha ahohmanh nih an ruahmi a si lo. Iran nih aa ruah lo tuk in nuclear hnatlaknak an tuah pi hna tikah US cungah nihsawhnak le zeirel lonak lehlam a ngei cang. Atu cu a ral zong a tha chin lengmang cang'tiah President Trump nih a chim.
Nuclear hnatlaknak an tuah kha 2015 ah a si i, 2016 ah US ralkap tlanhnak a tangka fang in US $1.7 billion an pek rih hna. President Trump caah tuar awk tha lo lawng te an si. Iran nih lente hlah maw a celh pi ti awk in US cu chuk-cho in a thui. Mah ruangah khan Trump nih Iran nuclear hnatlaknak hi ka hrawh colh lai a rak tinak zong kha a si.
Fox News nih biahalnak an tuah lioah Trump nih a nolh than rihmi cu 'hnatlaknak tuahmi vialte lakah a chia cem a si. An tuah lo dingmi an tuah. Na nuclear ser ngol law dan kan in tatmi kan lak than lai ti cu nichuak a si' tiah fak ngaiin a chim. Hihi Iran a ralthattertu zong a si i, US tiang a kan upat ti lonak a si' tiah Trump nih cun a ruah.
Tuan deuh zarhpini ah Iran nih missile hneksaknak a tuahmi kongah biahalnak an ngeih i ralkap hman ding tbk in ruahnak hna na ngei maw tiah an hal. Trump nih a lehmi cu 'cabuai cungah zeihmanh a tang ti lo' tiah a leh hna. A sullam cu dantat awk zong a um ti lo. Ralkap lawlaw in kan phomh hna a hau ko cang ti kha Trump bialehnak a si.
Iran leiin ralkap upa pakhat nih a vun leh than vemi hna cu 'US nih an ralkap in an kan doh ahcun fak tuk in kan lehrul ve hna lai, cun Israel cung zong ah kan missile kan tlakter thluahmah lai. Kan ral nih palhnak an tuah ahcun kan missile nih ruahsurh in a surh hna lai' tiah fak ngaiin a vun hro ve hna. Ref: TOI.
Iran Nih Israel Le US An Hrocer Ning A Fak Chin Lengmang
-------------------------------------