Biahaltu: Ka chungkhar hi biaknak biapi ah a ruatmi an si lo. Biakinn ah ka kal hi nupithitnak a um lioah voikhat ka rak kal. Biaknak he kaa pehtlai bal lo, asinain Jesuh Khrih ka zumh hnu lawng in biakinn ah a kalmi ka si. Zeiruangah dah tipilin hi a herh? A herh ko maw?
Billy Graham: Na nunnak Jesuh Khrih na pekmi cu kan lawmh pi tuk. Mipi hmaiah na zumhnak na phuan bal lo i, tipil na in rih lo ahcun na Pastor sinah va kal law na ceih pi ah a tha lai tiah fial kan duh. Tipilin cu Jesuh Khrih ah ka um cang timi hmelchunhnak lenglei langhternak a si. Tipil na in khi mipi hmai le Pathian hmaiah Khrih zultu ka si cang ti na phuan a si. Mah hnu khin cun Khrihfabu (Church) na sinak phuan a si cang.
Tipilinnak nih kanmah tuahsernak in khamhnak kan hmu lo timi a langhter. Jesuh Khrih le vailam cung a thihnak thawng in khamh kan si timi a langhter. Jesuh thihnak ah ka thi i, a thawhthannak ah ka tho than ve timi hmelchunhnak langhternak caah tuahmi a si. Jesuh Khrih he naa pehtlaihnak lenglei langhternak a si. Cun Jesuh Khrih he naa pehtlaihnak ah na zumhnak thancho ding kha naa tinh dingmi hmuithinh a si awk zong a si.
Midang he hawikawm kan si tikah caan kan hman deuhdeuh tikah kan i pehtlaihnak a thawng chin lengmang. Cu bantuk cun Jesuh Khrih he nan i pehtlaih deuhdeuh tikah na dawtnak, na zumhnak le na nunnak a thawng i aa dawh chin lengmang lai. Khrihfabu zong a biapi tuk. Pathian nih Khrihfabu chungtel thawngin na zumhnak an thawnter lai i, thazaang an pek lai. Bible rel caan le thlacam caan hi a dang tein na ngeih lengmang a hau.
Na chungkhar le na hawile ca zong ah thlacam lengmang law Pathian nih a auh ve te ko hna lai. Pathian nih na chungkhar le na hawile caah a tehte tha ah an hmang ko seh. TCP.
Billy Graham Bia An Hal I A Lehmi Hna: Kan Cawn Cio Ding Hrim A Si
--------------------------------