Tiva hna a that ahcun a luangmi tiva zong a tha i, a tiva hna a that lo ahcun a luangmi tiva zong a tha lo ti a si. Cucu US Supreme Court hi a si. US Suprem Court ah Liberal nih an uk ahcun Liberal policy a luang lai, asinain conservative nih an uk ahcun an policy a luang ve lai.
Nikum ah khan ruah lo piin conservative biaceihtu pakhat Antonin Scalia a rak thi. Mah hnu cun minung pariat lawng an tang. Pariat chungah pakhat biaceihtu Anthony Kennedy hi swing vote in a ummi a si, a sullam cu tanhhleimi ngei loin a duhnak paoh aa thial khomi a si. Liberal leiah a tan chel; conservative leiah a tan chel in a ummi a si.
Cucaah liberal lei nih an tei deuh lengmang hna. Asinain atu cun President Trump nih conservative biaceihtu Neil Gorsuch a chiah cang lai caah kap hnih in an i khingkhang cang lai. Trump nih a thimmi Neil Gorsuch hi kum 49 lawng a si rih i, US Supreme Court ah chan sau pi chung rian a tuan cang lai.
Ni kum ah khan President thing Obama nih biaceihtu Merrick Garland a rak thim nain Republican nih an rak hnonhpiak. A hlawhtling lo. President Trump nih nihnihni zan ah Neil Gorsuch a thim tikah Senate Democrats pawl cu an lung tha lo ngai.
Neil Gorsuch hi conservative phung le policy a nun pi cang lai tiah an zumh. Phunghram kongah Founding Father hna nih an rak tial duhnak lungthin in kan hrilhfiah ding a si tiah fek tein original meaning (sullam) aa kawlmi a si. Kan upadi zong kan tial ning tein kan fianter i kan hrilhfiah ding a si a ti. Hika ah cun a conservative ngai an ti. Obamacare zong a uar lo ngaimi a si.
Nauhrawhnak le gay marriage tbk hi cu a biapi ah a chia lai lo tiah an zumh. Cu hlan i an rak chah cangmi ning in a kal thiamthiam ko lai. A thlen dingmi le a rem than dingmi a um lai lo tiah an zumh. Asinain Neil Gorsuch nih nunnak kong a chimmi cu 'kan pumpak in timh ciammam tein nunnak kan lakmi hi cu a hmaan lo tukmi a si a ti.
Columbus University le Harvard Law School ah sianginn aa limmi a si i, President thing Obama he class khat thut ti zong an rak si. Oxford University ah Doctor zong a lami a si. Oxford a um chungah hin Winston Churchill biachimmi a uar ngai hna an ti. Ref: BBC& CNN.
An Buai Pi Tukmi 'Waterboarding' Hremnak Kong Le President Trump
------------------------------
--------------------------------