US nu-va nih an fanu min ah Allah an sak i, State Department of Public Health nih Birth Certificate an pe duh hna lo. An fanu hi thla 22 a si cang. Geogrgia State ah a ummi an si i, an fanu minsak an cohlanpiak duh hna lo caah taza an cuai hna.
Allah nu le pa Elizabeth Handy le Bilal Walk nih an chimmi cu atu tiang kan fanu min a ngei kho rih lo. Kan fanu min kan sakmi an kan cohlanpiak khawh lomi cu a poi taktak ko tiah an chim. An fanu min tling ah ZalyKha Graceful Lorraina Allah a si.
State Department official lei upa nih an chimhmi hna cu 'nan fanu min ah Allah timi hman loin Handy a si lo le Walk tu hi nan hman deuh ding a si. Nan duh rih lo a si le Handy le Walk fonh in nan sak khawh thiamthiam ko an ti hna. Allah timi cu Muslim Pathian min a si.
Chungkhar hna aiawh in Fulton County Superior Court ah American Civil Liberties Union (ACLU) nih tazacuainak ca a tialpiak hna. Hringtu a pa nih a chimmi cu 'Allah tiah kan auhnak ruang cu 'duhnung min a si tiah kan ruah caah a si' a ti. Kan fanu min sak a kan cohlanpiak duh lomi cu a hmaan lo pinah kan covo buar a si tiah a chim chih.
Department of Public Health lei nih an chimmi cu 'min sak tikah kan State phung ning tein an sak ding a si. A nu min maw a pa min kemh tel cun an sak ding hrimhrim a si' an ti. Birth Certificate an pek duh hna lo ahcun an fanu te caah Social Security Number an lak kho lai lo.
ACLU nih cun 'an fanu min sak an cohlanpiak duh lomi cu phunghram ning zong a si lo. A hleihluat tuk in karhlei an lamh bia a si' tiah an ti hna. Ref: BBC.