Nithumni ah Texas ah Khrihfabu motor (minibus) aa pah i, minung 12 an thi. Retreat (nuamhseihnak lengchuak) a kalmi an si i an kir leiah an motor le motor dang an i pah i minung 12 an thi. Minung pathum hliam hma an ing.
A hmutu pakhat nih cun 'motor an i pah ning a fak tuk. Zoh ngam ding hmanh in aa tuah lo' a ti. An motor mongtu zong a thi i, a thi lomi minung pathum cu helicopter in an thir hna i meng 75 a hlatnak San Antonio sizung an zuan pi hna.
Khrihfabu leiin an facebook ah an tialmi cu New Braunfels i First Baptist Church chungtel an si. Retreat an kalnak in an rak tin lei a si a ti. An i pah ning cang an hlat cuahmah lio a si. Senior Pastor Brad McLean nih a chimmi cu 'hi bantuk thil kan ton caan ahcun hmun khat ah kan ra cio i kan i hnem cio hna' a ti.
'Thla kan campiak hna. Kan hnemh hna. Bus chungah aho dah an um timi zong kan thei kho rih lo. Nawlngeitu leiin bia fiang kan thei rih lo' tiah CNN ah a chim chih.
Texas Governor Greg Abbott lei zong in hnemhnak bia an rak chim. 'A kan liam takmi hna nih kan ngaih a kan chiatter tuk. Ngaihtchiatnak a tongmi chungkhar kan in um pi ko hna' tiah twitter ah a tial. Ref: CNN.