President Trump nih President thing Obama sual a puhmi kong cu a tliang kho rih lo. Fox News nih bia an hal i, 'hmai zarh in cun Obama nih ka phone ah biangaihnak a chiah ko timi tehte ka langhter cang lai' tiah a chim. 'Hmai zarh ah khuaruahhar ngai thil zong nan hmuh te lai' tiah a chimh hna.
Sungthoh bu cheukhat nih cun President Trump sualpuhnak hi hram ngei lomi a si an ti. Democrats upa an siah Republican upa an siah Trump sualpuhnak an zum ve lo. Obama nih Trump a tuaitamnak ding tehte hrimhrim a um lo an ti.
Congress i House biachimtu Paul Ryan zong nih 'kan fiang dih ko cang. Tehte hrimhrim a um lo' a ti. Marh 4 ni ah khan President Trump nih twitter in 'Trump Tower hotel i ka phone ah biangaihnak a chiah' tiah a rak tial. Obama nih cun 'a hmaan hrimhrim a hmaan lo' a ti.
House Intelligence Committee chairman, Republican Devin Nunes nih nithumni ah Trump sualpuhnak konghe pehtlaiin press conference a tuah i, a chimmi cu 'Obama nih a tuah taktak ko timi tehte kan ngei lo. Trump Tower ah cu bantuk a um lai ti ka zum lo' tiah a chim.
Democrats lei upa zong an siah Republican upa an siah Trump a dir pimi an um hna lo. Asinain 'Arau hlanah ka phuan cang lai' tiah Trump nih a chimmi hngah a hau cang. Ref: VOA News.