Eli Cohen hi Israel sungthoh minthang taktak a rak si. Israel nih Six Day War an rak teinak zong Eli Cohen thawngin a si tiah upatnak an pek i, an thangthat ngaimi pasal tha a si. Asinain Syrian nih an rak tlaih i, 1965 ah mipi hmaiah an rak thlai. Israel nih atu tiang an ruak an kawl peng.
A min ah Kamel Amin Thaabet tiah a rak i hlen i Syrian cozah chungril tiang a rak sungthoh khomi pa a si. Kum li chung a sungthoh hna hnuah vanchiat ah an rak theih i an tlaih. May 18, 1965 ah mipi hmaiah an rak tlai. An minthang pa Cohen luatter awk ah Israel nih ram kip president le Pope tiang in bawmh an rak hal hna i Syrian cozah an rak nawlpial hna.
Israel minthang sungthoh
Asinain Syria ralkap le runvennak konglam chungril tiang a rak theih dih caah Syria cozah nih thinhun tuk lung in an rak tlai. Israel sungthoh Mossad nih cun Six Day War kan teinak cu Eli Cohen thawngin a si tiah upatnak le thangthatnak an pek. Israel nih a ruak tel kan pe u tiah an rak halmi zong Syria nih an rak pe duh hna lo. Asinain nihin tiang Cohen ruak an kawl lengmang.
Syria bochan bikmi Russia President Putin le Prime Minister Dmitry Medvedev zong Israel nih bawmh an hal lengmang hna. Cohen ruak kan halpiak hna u tiah an nawl lengmang hna. Russia zong nih pe hna u tiah Syrian cozah cu an chimh lengmang hna nain Syrian cozah nih an lehmi cu 'Cohen kan phumnak kan thei ti lo' an ti hna.
Syrian cozah lei nih an chim thanmi cu 'kan chek i kan kawl len nain kan phumnak kan thei ti lo. Zei ti awk a tha' tiah Russia cu an leh hna. "Syrian cozah nih Russia sinah bia an leh ning cu Russia lei tha a chia ngai. Syria cungah an lungtling lo tuk' tiah Russian official pakhat nih a chim.
Eli Cohne he a rak i theimi Syrian ralbawi thing a simi Monjer Motsley nih 2008 ah a rak chimmi cu 'Israel sungthoh nih a ruak an fir sual lai tiah Syrian cozah nih voi thum tiang a ruak an thial' tiah a chim. Ref: TOI.
(Eli Cohen kong fiang deuh le tling deuh in rel na duh ahcun Luther Tin Hre nih a lehmi 'Sungthoh Kip Siangpahrang Fa: Israel Sungthoh Bu Tuanbia Tling, page 136-154 ah rel khawh a si lai).