North Korea cawlcangh a chia chin lengmang i Japan nih a zoh kho ti hna lai. Lakhruak in phomh ding in an au chin lengmang cang. Ralpi Pahnihnak a dih hnu in atu hi Japan nih lakhruak in North Korea kah ding in a chim a si.
Japan hruaitu upa pawl nih an chimmi cu 'US lawng te bochan lengmang naak cun kanmah tein lakhruak in phomh ding an si ko' an ti. Naite North Korea nih missile pali a hneksak i pathum cu Japan rili le rili kam ah an tla hna. Kum dang zong an kah lengmang cang.
Liberal Democratic Party security committee hruaitu Hiroshi Imazu nih Washington Post ah a chimmi cu 'kan hngak kho ti lo. Hitihin kan um peng lengmangmi nih kanmah lehlam a kan hrawhnak a si te lai. North Korea hi kan zoh kho ti hna lo' a ti.
A chim thanmi cu 'missile in a kan kapmi kan ral kahnak lam kan ngei ko. Asinain thilri le thil ti khawhnak kan ngei lo. Kan ram cu ramdang nih runvenmi kan si. Kanmah nih cun kan rungveng kho hna lo' tiah a chim chih.
Defence Minister Gen Nakatani zong nih a chimmi cu 'lakruak in kah khawhnak hna thazaang hi kan ruah a hau ko cang. Atu cun Japan nih North Korea kah khawhnak thazang kan ngei lo' a ti. Kan hnu zarh ah Prime Minister Shinzo Abe nih 'North Korea cawlcangh hi tha tein kan zoh a hau cang' a ti.
Japan hi Ralpi Pahnihnak i an rak sungh hnu cun raltuk le hriamnam tlaih hi an duh ti lo. Asinain 2015 ah Abe nih upadi thar a ser i, ram runvennak ralkap an i chiahmi zong ral an doh kho than cang lai ti a si. Ref: Daily Mail.