US Secretary of State Rex Tillerson cu nirukni le zarhpini ah Taluk ah a um. North Korea kong biapi ngaiin Taluk hruaitu he an ceih. North Korea nih aa bohan cemmi cu Taluk an si. An ramchung tangka hmuhnak 75% hi Taluk in a si.
Taluk nih an dirkamh lengmang hna. Fak deuh in US nih an vun hro caan hmanh ah Taluk nih a dirkamh lengmangmi an si. Asinain nizan ah North Korea nih lamhla a kap khomi rocket engine a hneksak than. Tuan deuh ah a missile pali hneksaknak zong a tuah cang.
Nizan hneksaknak a tuahmi cu a hlawhtling ngai an ti. N. Korea hruaitu Kim Jong-un lengbang cu a ha hmanh a khumh kho lo. A riantuantu upa zong an lungtling tuk. An hneksakmi rocket engine hi a thazaang thawng ngaimi a si. 'Kan tuanbia ah hlawhtlinnak nganpi pakhat kan ser' tiah Kim nih cun a chim.
Asinain US lei cun an thinhung ngaingai cang. President Trump nih cun 'Kim Jong-un cawlcangh aa dawhcah ti lo. Dawhcah lo cawlcangh a si' a ti cang. Twitter ah a tial thanmi cu 'North Korea ziaza hi a hmaan lo chin lengmang. Kum tam tuk US lente a kan celh pi cang. Taluk zong nih zeihmanh tuah aa tim lo' a ti.
Tillerson zong nih 'cabuai zong ah zei poah a um dih cang. Ralkap zong in kan lehrul khawh cang hna tiah Asia ram a tlawn lioah Japan ah a chim. Taluk zong ah a nolh than. Tuan ah US leiin lehrulnak a ra colh lai tiah an zumh. Ref: The sun.