Inn Raang ah ruahnak petu Kellyanne Conways cu President Trump nih Obama sual a puhnak kongah CNN nih biahalnak an tuah i, 'tehte ngeihnak kongah tuanvo ngeitu ka si lo. Mah ruangah hin pei hlathlai cu a herh fom cu' tiah a leh hna. An buai pi ngaimi kong pakhat a si.
Naite ah President Trump nih Obama cu ruah lo piin sual a puh. Trump Tower hotel i ka phone chungah biangaihnak (wiretape) a chiah i, a thli tein a rak ka hlathlai lengmang a ti. Mah kongah CNN leiin Chris Cuomo nih Trump ruahnak petu Conways cu biahalnak an tuah.
Kellyanne Conways nih a lehmi hna cu 'tehte ngeihnak kongah tuanvo ngeitu ka si lo. Mah ruangah cun pei hlathlai cu a hauh fom cu' tiah a leh hna. Nikhatni ah hin Inn Raang sungthoh bu nih tehte langhter ding timhnak an ngei tiah theih a si. Asinain Conways nih cu kong cu a chim chih lo.
A chimmi cu 'The House/Senate committees nih an hlathlai cuahmah lio a si. A hnuah an fianter te ko lai' a ti. Asinain cheukhat upa nih cun Trump sualpuhnak hi a hmaan lai ti an zum lo. Obama lei biachimtu zong nih 'a hmaan hrim a hmaan lo' an ti.
Arizona Senator John McCain nih CNN ah a chimmi cu 'President Trump nih thim ding pahnih lakah pakhat a ngeihmi a biachim a let than lai maw, sual a puhnak tehte dah a langhter lai a ti. Tehte a langhter khawh ahcun President thing Obama nih upadi a buar tinak a si lai i, a poi ngai dingmi thil a si' a ti. 'Sual a puhmi hi a hmaan lai tiah zumhnak ding a ruang ka ngei lo' tiah chim chih. Ref: VOA News.