President Trump a kai hnuin US-Taluk pektlaihnak a linsa lengmang. Tawan kong a siah South Korea i THAAD chiah a timhmi kong a siah Japan he Island an i cuhmi kong a siah US cungah Taluk a lungtling kho bal lo. Taluk nih a raltuknak vanlawng thazaang thar a vun langhter i an khuaruahhar ko.
Britain raltuknak vanlawng F35s cu Taluk J-20 sinah cun chim awk tlak a si ti lo an ti. Taluk raltuknak vanlawng sinah cun hlan chan thil bantuk a si cang. Taluk raltuknak vanlawng hi sau deuh a zuang kho, a chunglei thazang a thawng deuh, i a hriamnam zong a tha deuh an ti.
Britain F-35s a ran hi 1,199mph a si i, Taluk J-20 hi 1,305mph a si. Asinain Britian raltuknak vanlawng hi a tum tikah ding tein a tum kho i, van le van kahnak ah a tha deuh kho men an ti. Taluk J-20 hi a tum tikah tliknak hmun a hau i, van le van kahnak caah F-35 a tluk hnga maw an ti. Taluk J-20 an langhter hi 2016 ah a si.
Report tial ning ahcun lenglei minung hmuhter an sianh hna lo. Taluk nih hi bantuk raltuknak vanlawng (Stealth Fighters) tampi a ngei rih lo. Tam deuh chin lengmang in ser an timh cang. Hi bantukin Taluk nih a raltuknak vanlanwg a vun langhtermi hi US he kan i dohnak a taktak in a lang chin lengmang cang an ti.
Kan hriamnam thanchonnak caah seven percent in tangka ka hman than lai tiah zahan zarh ah a phuan. US nih kum khat ah a hmanmi cheu li cheu khat tluk hrawng a si lai. Chunglei kong theih nih a chim chihmi cu a raltuknak thazaang a vun langhtermi cu Japan le South Korea hrocernak zong a si. Taluk nih a rannak in a thazaang le a hlawhtlinnak langhter caan a si cang' tiah a chim. Ref: The Express.