India ram West Bengal khuate pakhat ah minung ruh 365 an hmuh hnuah police nih lunghrinhmi minung pariat (8) an tlaih hna. Police lei upa cem Ajay Sharma nih a chimmi cu 'minung ruh an lakmi hi West Bengal tiva ah an lak theo lai tiah zumh a si' a ti.
A chim thanmi cu 'tiva ah an pum hi ciah hna seh law an taksa a maan dih hnuah an ruk lawng a tangmi an lak theo hna lai. An ruk lakmi hi thiang tein si an thuk dih hna i local doctor le sizung tbk ah an zuar hna. Minung pariat kan tlaihmi hna hi a voikhatnak kan tlaih hmasa cem an si' a ti.
India cozah nih minung ruh zuar hi 1985 ah a rak khap cang. Human rights group nih an rak doh tuk hna ruangah an rak khapmi a si. A rak khap hlanah cun India hi minung ruh a zuarmi ah vawleicung ah a thawng cem an si. Vawleicung ram sizung le laboratory kip ah an rak phanh pi hna.
1985 ah an rak khap hmanh ah hin an rak ngol colh lo. Thlithup in an zuar peng rih. A min langhter a duh lomi police nih a chimmi cu 'West Bengal hi a hrambunh ah hmang in thlithup ruh zuarnak hram an an rak hman. 2009 ah bus khat tein minung pakhat nih Bihar State ah minung ruh 67 a rak phurh i an rak tlaih.
A hlan deuh ah India-Nepal ramri ah minung 70 phurmi an rak tlaih rih hna. Hmun dangdang zong ah an rak tlaih len rih hna. India hi minung ruh zuar a thawng bik an si lengmang. Cozah nih a khap buin a thlithup in an tuah lengmang. Cozah nih a onhmi tu cu sizung lawng nih a herh ning in ruh kawl khawh a si.
Cu hmanh ahcun document deu an tuah than i a thlithup in sizung cheukhat ah a zuarmi an um rih hna. Ref: CNN.