President Trump le German hruaitu Merkel cu Inn Raang Joint Conference ah tonnak an ngei. An i ruah dingmi biatungtlang chimphuannak zong mipi hmaiah an ngei i, mipi leiin biahalnak zong an ngeih hna. Trump nih NATO kong in a thok hmasa. A pek dingmi tangka an pek awk a si a ti.
NATO ram nih NATO caah tangka a thawh lomi an tam pi rih a ti. A pe rih lomi paoh nih an pek awk a si tiah a chim chih. Asinain NATO a dirkamhnak cu fiang tein a langhter. NATO a dirkamh ngaimi ka si a ti. German zong hi an ramchung tangka hmuhmi GDP chungah 2% hi NATO ah a pek ding an si a ti.
Asinain an tlinh ve lo. 1.19% tiang hrawng lawng an pek khawh rih. A luan cia i Trump he an bia aa kalhnak tete Merkel nih fianternak zong vun a tuah chih ve. Pakhat le pakhat kong kan i ceihmi naak in pakhat le pakhat kan i ton i, kan i ruahmi hi a tha deuh tuk' a ti ve. Trump muslim khamnak kongah Merkel nih a soisel len.
Trump zong nih 'zalong tuk in a ram ah refugee a lakmi cu a tihnung tukmi a si' a rak ti ve. Merkel nih Trump NATO a dirkamhmi cungah a lunglawmhnak a langhter. Trump le Merkel an i ton hlan deuh ah khan Inn Raang Press Secretary Spicer nih Uk sungthoh ngaihthiam halnak bia a chim.
Obama nih British sungthoh a fial hna i ka phone ah biangaihnak an chiah a rak timi cu Merkel he an i ton hlan deuh ah official tein ngaihthiam halnak bia an chim. 'Hi bantuk hi kan chim ti lai lo' an ti. Ref: CNN.